Cabugao, Ilocos Sur – Ti grupo ti Clean and Green Program ti Munisipio ket as-asikasuenna dagiti Pasilidad ti Munisipio (Parke ken Plaza) tapno naan-anay iti pannakalinis ken pannakapapintasda a mabuya iti aglawlaw.
Maysa a kangrunaan a mamantener ket iti Cabugao Central Park (CCP) a daydaywen ti umili ken bisita iti aldaw ken sardam ken kangrunaan a disso a pakaangayan/pagpabuyaan dagiti aktibidades kadagiti aldaw a panagpiesta ti ili iti Abril 2018.
Iti sabali a bangir, agtultuloy met a mamantener dagiti pasilidad nga usaren ti sapasap nga aggatang iti NISTC Public Market. Babaen iti panangilungalong ti LGU-Cabugao nga idauluan ni Mayor Josh Edaward S. Cobangbang ket napapintas ti pasdek-NISTC Public Market ken nataming ti water system iti Tiendaan tapno naan-anay a maserbian ti publiko kabayatan nga addada a gumatgatang iti Tiendaan.
Kabayatanna, regular met a madalusan iti aglawlaw ti pasdek ti Cabugao Commercial Annex iti sango ti NISTC Public Market kasta metten iti pagperiaan iti lauden ti Food Court ken rinabii ti ipapan ti panag-peria dagiti umili ken iti pamiliada a pangparagsak iti umadani a panagpiesta ti ili.
Dagitoy nga aksion ken inisiatiba ket paset ti Direktiba ti Municipal Chief Executive ti ili iti agtultuloy a panangpapintas iti aglawlaw iti ili a pagsayaatan ken pakairanudan ti sapasap ken panagsagana para iti panagrugi ti selebrasion ti Semana Santa iti Marso 2018 ken panagpiesta ti ili iti Cabugao iti Abril 2018. # (Web In-Action)
No comments:
Post a Comment