Cabugao, Ilocos Sur – Naregta latta a maiyim-implimentar dagiti aktibidades ken programa ti Municipal Livestock Office – DA LGU Cabugao nga imatonan ni Dr. Melvin G. Castro, DVM babaen iti nasaknap a pannakaangay ti Anti-Rabies Campaign (injection ti anti-rabies kadagiti household pets a kas iti aso ken pusa) a nayeskediul iti tunggal barangay kasta metten iti pannakaasikaso dagiti large cattle a kas iti nuang ken baka a pakaseknan iti panagmarka (Branding); pannakaited ti Vitamin Supplementation; Deworming ken Vaccination.
Malaksid kadagiti regular a nayeskediul a trabaho ni Dr. Castro, isamsamirana pay a sarungkaran dagiti klientena nga agayab kenkuana nga agagas iti masakit a dinguen ken iti panagbakuna uray iti aldaw ti Sabado ken ti Domingo.
Ita a bulan ti Marso 2018, sumursurot da Dr. Castro kadagiti mapan ag-Tax Campaign a Taga-Munisipio kadagiti barangay tapno mamaksimisa iti tiempona a makipagkita kadagiti klientena a taga-away.
Ti nasaknap a pannakataming dagiti dinguen ket komkomplementaran ti LGU- Cabugao nga idauluan ni Mayor Josh Edward S. Cobangbang babaen iti agtultuloy a suportana iti programa ti Municipal Livestock Office a nga “Animal Care Program”.
Dagitoy nga aksion ken inisiatiba ket gubuay iti napintek ken agtultuloy a programa ti LGU-Cabugao iti livestock industry iti babaen ti liderato ni Mayor Josh Edward S. Cobangbang tapno masustener ti pannakataming dagiti dinguen ken livestock iti Munisipalidad a katulongan ti panagbiag dagiti mannalon. # (Web In-Action)
No comments:
Post a Comment