Cabugao, Ilocos Sur - Iti panaglukat ti 4th Governor’s Cup 2018 Intertown Volleyball Tournament idiay Sto. Domingo People’s Coliseum, Sto. Domingo, Ilocos Sur ket nakipartisipar ti Team ti Cabugao a tinarabay ni Mr. Kevin S. Somera, napusgan a Municipal Youth Coordinator ti ili.
Imbatad ni Mr. Somera a napasamak ti panagtakuatda kadagiti makabael a players nga agay-ayam iti volleyball (women category) kabayatan iti sinnalisal iti naaramid a 2018 Unit 1 Palaro ti DepED ditoy nga ili a nagsasalipan dagiti atleta para iti nadumaduma nga sports event idi Oktubre 1-3, 2018 iti Cabugao Athletic Oval, Barangay Bonifacio, Cabugao, Ilocos Sur. Ditoy a salip ket nakipaset ti amin a sekundaria a pageskuelaan iti ili kadagiti umaayam nangruna iti volleyball.
Innayon ni Mr. Somera a katinnulongna ken adda iti pannakigamulo ditoy ni Pambayan Pederasyon ng SK President Hon. Marc Russel Morales agsipud ta isuna ti kangrunaan a mangtimtimon kadagiti agtutubo a kameng iti Sangguniang Kabataan iti ili ti Cabugao. Kangrunaanna pay, ti sports ti maysa a programa dagiti agtutubo ditoy nga ili tapno mayadayoda iti bisio ken agbalinda a naresponsable nga umili.
Kabayatanna, segun ken ni Provincial Sports Chief Marius Cabudol a manamnama a maikkan iti inspirasyon dagiti volleyball players nga agay-ayam para kadagiti bukodda a team.
Kinunana pay nga ad-adu a team ti aglalaban ita a tawen gapu ta adda dagiti aggapu kadagiti upland municipalities. # NAADAW
No comments:
Post a Comment