Cabugao, Ilocos Sur – Naangay ti Barangay Assembly Day idi Oktubre 14, 2018 a kas panagtungpal iti pammilin ti Department of the Interior and Local Government (DILG) iti amin a Barangay iti intero a Pilipinas babaen iti Tema: “Kapit-kamay tungo sa Pagbabago ng Barangay! Makiisa! Makilahok! Makialam”.
Kabayatanna, naballigi ti pannaipatungpal ti Barangay Assembly Day kadagiti Barangay iti ili a Cabugao, Ilocos Sur iti nadakamat a petsa, segun ken ni Municipal Local Government Operations Officer Constancia “Connie” L. Quinola, LGOO V, ti ili a Cabugao a nangtarawidwid iti pannakaipatungpal daytoy a pammilin.
Kaaduan a Topiko a natratar kabayatan iti nasao a taripnong ket iti maipapan iti presentasion ti accomplishment and financial reports, problema, issues and concerns a mangapektar iti barangay ken iti pakaseknan pay iti solidwaste management, disaster risk reduction and management plan ti barangays, Re-greening Program ken dadduma pay nga aktibidades a kanaig iti naan-anay a pannakigamulo dagiti bumarangay iti pakaseknanda.
Innayon ni Mrs. Quinola a naibasa pay ti Mensahe ni OIC DILG Secretary Eduardo M. Ano ken naannayas ti pannakaipatungpal daytoy a pammilin iti DILG iti 33 a barangay ti ili a Cabugao, Ilocos Sur ken naballigi a nataming dagiti napagsasaritaanda.
Kanaig daytoy, nakipaset ni Mayor Josh Edward S. Cobangbang iti naangay a Barangay Assembly Day idiay Barangay Bonifacio, Cabugao, Ilocos Sur idi Oktubre 14, 2018.
Iti biang ti sibubukel a Barangay Council nga idauluan da Punong Barangay Michael Angelo B. Sarmiento ken ni OIC Punong Barangay Evelyn P. Vallejo, pagyamyamananda dagiti Opisiales ti ili; kameng ti Barangay Council; Barangay Employees ken dagiti Miyembros/Opisiales iti nagduduma nga NGOs iti barangay iti anus ken ayatda a nakipaset iti nadakamat a taripnong. # (Web In-Action)
No comments:
Post a Comment