Cabugao, Ilocos Sur – Nagun-od manen ti Cabugao Team iti Over-all Champion iti 3-Day Unit 1 Sports Competition 2018 (Oktubre 1-3, 2018) kadagiti pageskuelaan (Elementary ken High Schools) iti uppat nga ili a kas iti Sinait, Cabugao, San Juan ken ti Magsingal iti umuna a Distrito ti Probinsia ti Ilocos Sur iti uneg ti Cabugao Athletic Oval, Barangay Bonifacio, Cabugao, Ilocos Sur a nagatendaran dagiti napili nga Atleta a mangibagi iti tunggal pagadalan iti kada ili, Officiating Officials, Coaches, Mangisursuro, PTAs ken dagiti nagannak a nangtarabay kadagiti annakda a nakibalubal iti nadumaduma nga sports events.
Iti Closing and Awarding Ceremony iti malem ti Oktubre 3, 2018, indauluan ni Mayor Josh Edward S. Cobangbang ken binayabay da SK Federated President Marc Russel Morales ken ni San Juan Federated SK President Karl Jefferson L. Ubaldo agraman dagiti MAPEH Coordinators iti nagited kadagiti Awards kadagiti nagabak a pageskuelaan ken Atleta iti nadakamat nga uppat nga ili.
Ti resulta ti 3 nga aldaw a pasalip a kas impakaammo ni Mrs. Estrellita M. Siruno, Principal III, CSCS ken Unit 1 Chairman ket dagiti sumaganad: Elementary Level Champion – Cabugao Team; San Juan Team, 1st Runner-up; Sinait Team, 2nd Runner-up ken ti Magsingal Team, 3rd Runner-up.
Iti met biang ti sekundaria; Champion – San Juan Team; 1st Runner-up, Cabugao Team; 2nd Runner-up, Sinait Team ken 3rd Runner-up ti Magsingal Team.
Nakikaysa met ni Cabugao District Athletic Sports Manager Ronel M. Ubaldo a nangbayabay ken ni Mayor Josh Edward a nagiyawat iti Trophies iti School Stage ti Cabugao Athletic Oval.
Segun iti matalek a mapagdamagan, ti ili a San Juan ti sumublat a Host iti nasao a pasalip inton Tawen 2019. # (Web In-Action)
No comments:
Post a Comment