Cabugao, Ilocos Sur – Ti Department of Health (DOH) babaen iti panagkammayetda iti LGU-Cabugao ket narugian ti Ligtas Tigdas Supplemental Immunization Activity (SIA) para iti immunization program iti amin a maseknan nga ubbing/maladaga kadagiti barangay iti masakupan ti ili.
Ditoy ili a Cabugao, Ilocos Sur ket nairugi idi Oktubre 16, 2018 ket nabukel dagiti Vaccinators Team nga aggapu iti Rural Health Unit (RHU)-Cabugao a nag-eskediul kadagiti 33 a barangay ti ili.
Ti maibakuna ket MMR a para Kontra Kamuras (Injectable) ken OPV Kontra Polio (Oral) kadagiti ubbing nga ag-edad ti 6-59 a bulan iti barangay ket naawagan ti Door-to-Door Vaccination daytoy ta danonen dagiti agbakuna dagiti ubbing wenno mangaramidda iti wagas a nadaras a mamobilisarda dagiti inna nga agturong iti maysa a lugar nga asideg a paguurnonganda nga agpabakuna.
Ti pannakaisaknap iti napintas a serbisio para iti salun-at dagiti ubbing ket prayoridad a programa ti LGU-Cabugao nga idauluan ni Mayor Josh Edward S. Cobangbang tapno agtultuloy a mamantener iti salun-at dagiti agtan-ay nga ubbing para iti natibker a pamilia iti kagimongan ti ili. # (Web In-Action)
No comments:
Post a Comment