Thursday, February 13, 2014

MAIDAKNIR A MARINE MAMMAL, NATRATAR ITI SEMINAR

Cabugao, Ilocos  Sur – Tapno maited iti naan-anay  a pannakaasikaso dagiti maidakdaknir a nabiag iti baybay kas iti Dolphin, Pating (Whales)  ken Sea Turtles, nangirusat ti BFAR Region 1 nga idauluan ni BFAR Regional Director Nestor Domenden, CESO V iti panagsanay kadagiti Technical Personnel a naggapu kadagiti Coastal Municipalities iti intero a Region 1 idi Pebrero 10, 2014.

Maysa ti ili a Cabugao, Ilocos Sur a naawis a makipaset iti nasao a seminar ket inaprobaran ni Mayor Edgardo S. Cobangbang, Jr. ti panagatendar da Dr. Melvyn G. Castro, DVM ken ni Mrs. Milagros R. Paz, Fish Examiner iti maysa nga aldaw a Seminar Workshop/Action Planning a naaramid idiay BFAR Training Center, Lucap, Alaminos City,  Pangasinan.

Segun ken ni Mrs. Paz, kangrunaan a trinatarda iti nasao a seminar ti pannakaprotektar dagiti marine mammals iti didigra a patauden ti dynamite fishing, panangtiped iti nasaknap a pannakarugit ti baybay gapu iti maibelbelleng a basura ken dadduma a kita ti makasabidong a bambanag.

Innayon ni Mrs. Paz a nagbalin nga “stranding hotspot” ti Region 1 gapu iti nairekord a 16 a pannakaidaknir dagiti “endangered species” ti baybay  a protprotektaran ti Gobierno Nasional kadagiti kabaybayan  ket daytoy ti gapuna a nangigannuat ti BFAR iti teknikal a pannakaasikaso dagitoy
a pakaseknan.

Ti BFAR ket kaduana ti Philippine Marine Mammal Stranding Network (PMMSN), Region 1 a nangiwayat kadaytoy a napateg a panagiinnadal. # (Adapted News)

No comments:

Post a Comment