Friday, February 14, 2014

PRE-COUNSELING DAGITI AGASAWA, NAANGAY

Cabugao, Ilocos Sur – Naangay ti Pre-Marriage Counseling dagiti apagassawa a makipaset iti maangay a “Mass Wedding”  ditoy Munisipio iti panangannong ni Mayor Edgardo “Ediboy” S. Cobangbang, Jr. inton Pebrero 28, 2014.
 

Naangay ti panagtitipon iti Municipal Conference Building idi Pebrero 13, 2014 ket nangited ti Inspirational Message ni Mayor Ediboy kadagiti nagseminar iti Pre-Marriage Counseling. Nagsarita met da MSWD Officer Mrs. Lydia S. Gazmen, Mrs. Janet Sison, Public Health Nurse ti RHU-Cabugao ken ni Mrs. Rosario  Corazon S. Abara, Municipal Civil Registrar ti ili a Cabugao, Ilocos Sur. Iti nasao a seminar, impasagepsep dagiti Resource Person iti napintas ken natunos a panagdenna dagiti agassawa a mangbangon iti natibker ken naragsak a pamiliada.

Kabayatanna, nagpalista dagiti agkakasar iti Opisina ni Municipal Agriculturist Zenaida S. Andrada ti DA-LGU para iti panagalada iti “Love Tree” a kasapulan nga imulada a kas panangannurot iti pammilin ti  maysa nga Ordinansa ti Ili  a maiyaplikar  kadagiti apagassawa sakbay iti panagkasar dagitoy.

Segun ken ni Mrs. Abara, umabot iti 25 a bilang ti agparis nga agassawa a nagparehistro para iti nadakamat a Mass Wedding. # (Web In-Action)

No comments:

Post a Comment