Thursday, February 6, 2014

SPECIAL PROJECT TI TECHNO-DEMO ITI DUA A BRGYS.

Cabugao, Ilocos Sur – Inrusuat ti LGU Cabugao iti pannakikammayetna iti Department of Agriculture (DA)-RFO 1,  San Fernando City, La Union dagiti Special Project ti Ahensia iti dua a barangay: Catucdaan ken Nagsantaan ita a Dry Season 2013-2014 (Nobiembre-Mayo) tapno maikkan met ti proyekto dagiti nasulinek a barangay ti ili a pag-modeluan dagiti Rice Farmers.

Segun ken ni Mr. Nereo S. Daproza, Municipal Rice Program Coordinator, pakabuklan ti nasao a proyekto ti Techno-Demo Hybrid Rice ti Sitio Gapang, Brgy. Catucdaan ken ti Techno-Demo Inbred Rice ti Brgy. Nagsantaan. Addaan dagitoy iti kalawa a saggugudua nga ektaria ken dua a Farmer-Cooperator ti nakaitalkanda.

Kangrunaan a panggep daytoy a proyekto iti mangipakita met iti Demo-Farm ti Munisipio ken ti DA iti nagtetengngaan a barangay iti ruar ti Poblasion tapno adda pagtuladan dagiti mannalon ditoy a deppaar  ket maingato ti produksionda ti pagay ken maikabassit ti gastosenda iti panagtalon.

Dagitoy nga inisiatiba ket resulta iti naregget ken agtultuloy a programa ti Gobierno Munisipal iti benneg ti Agrikultura nga idauluan ni Mayor Edgardo “Ediboy” S. Cobangbang, Jr. tapno saan a maud-udi  dagiti mannalon nangruna kadagiti agindeg kadagiti aw-away. # (Web In-Action)

No comments:

Post a Comment