Cabugao, Ilocos Sur – Naangay ti “Deworming” babaen iti Health and Nutrition Program ti Ahensia ti Department of Education (DepED) kadagiti Pre-schoolers agingga iti Grade VI iti Cabugao South Central School, Brgy. Bonifacio, Cabugao, Ilocos Sur idi Pebrero 5, 2014.
Sakbay a mapurga ti ubing ket naited sakbayna ti papel a mapirmaan babaen kadagiti nagannak iti pammalubosda kadagiti ubbing iti pannakaited kadakuada iti ipaunegda a purga.
Segun ken ni Dr. Joan Somera Peralta a nangbayabay iti grupo dagiti agpurga ket mamindua iti makatawen a maikkan ti purga dagiti ubbing tapno maipasigurado ti pannakaiyintek iti bagida dagiti sustansia a laklak-amen dagiti ubbing iti inaldaw a pannanganda a makatulong unay iti napintas a panagis-isipda iti panagadalda.
Innayon ni Dr. Peralta a malaksid iti Deworming ket irusuatda pay ti Dental Check-up iti Pre-School iti Brgy. Cuancabal, Lipit ken Arnap inton Pebrero 7, 2014.
Kadua ni Dr. Peralta da Ms. Angelita Amilao Viloria, Nurse, ken ni Mr. Raymund Taborda iti naaramid a Deworming Activity iti Cabugao South Central School. Indauluan met ni Mrs. Melvie S. Sajonia, Principal II, CSCS dagiti kaduana a mangisursuro a nangtarabay kadagiti ubbing kabayatan nga agipaunegda ti purgada. # (Web In-Action)
No comments:
Post a Comment