Cabugao, Ilocos Sur – Agrikrikus latta ti obraen dagiti LGU-Personnel iti Clean and Green a tartarabayen ni MENRO Edgar S. Balangatan. Kalpasan ti pannakadalus ti agsumbangir ti National Highway manipud Brgy. Sagayaden agingga iti Brgy. Pug-os ket maar-aramid ita ti pannakadalus dagiti pampubliko a lugar nga asideg ti establisimiento kas iti masakupan ti Munisipio, Motorpool, Parke, Slaughterhouse, Cabugao Dayo ken idiay Tiendaan (NISTC-Public Market).
Iti pannaki-amad ti Web In-Action itay nabiit, imbatad ni MENRO Balangatan a kasapulan a madalusan ti amin nga espasio tapno awan ti pagaponan ti peste, insekto wenno lamok ken masalput latta ti lawag ti init.
Innayon pay ni MENRO Balangatan nga maus-usaren ti napasementoda a working area/basement ti Municipal Plant and Nursery ken Vermiculture Bin ket nasimbeng ti pagobraan dagiti mai-detalye nga LGU Personnel kadagitoy dua a benneg ti pagtrabahuan iti inaldaw.
Insupusop pay ti MENRO a masansan a bisitaenda ti Ecology Center idiay Sitio Baliw, Brgy. Quezon, Cabugao, Ilocos Sur tapno kakoordinarda ti pagdurdur-asan ti Ecology kadagiti mangtartarawidwid iti LGA Technology, Inc. a nangkontrata iti pannakaidalimanek ti basura iti Munisipalidad.
Dagitoy nga aksion ken inisiatiba ket gubuayen ti napintek a programa iti agtultuloy a panagdaldalus ken sanitasion nga itandudo ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno masaluadan ti salun-at ti sapasap nga umili. # (Web In-Action)
No comments:
Post a Comment