Cabugao, Ilocos Sur – Segun ken ni Mr. Dominador Reynold S. Sabio, Presidente, BACALL MPA ti Barangay Baclig, Cabugao, Ilocos Sur nga iti kaadda ti post-harvest facility a Flatbed Dryer-da ket dakkel unay ti maitulongna uray iti panawen ti kainit ken katudona iti amin a bilagen a produkto kangrunaan iti pagay ken mais.
Innayon pay ni Mr. Sabio, nadutokan babaen iti DA-LGU a Gov. Ryan Corn Program Coordinator ditoy ili a Cabugao a mangrugi ti tudtudo ti bulan ti Hunio ditoy Ilokos ngem agsangpet dagiti umay agpamaga iti Flatbed Dryer-da a kasta man met laengen iti napasamak iti kallabes a tawen maigapu ta awan metten ti ressatna iti panagmula dagiti mannalon iti mais (puraw wenno amarilio) iti aniaman a bulan ti tawen tapno maingato ti matgedanda iti panagtalon.
Insupusop ni Mr. Sabio a malaksid a makatulong ti Flatbed Dryer a mangparnuay iti pagsapulan dagiti kameng/tao a katulonganda nga agobra, saan a maarus dagiti ipamagada iti kalidad a kayat dagiti Corn Traders a gatangen iti napintas a presio iti saan a bumaba iti P12/kilo no di ket ngumatngato pay maigapu iti linteg ti “Supply and Demand” ti mais iti merkado.
Mangnamnama ni Mr. Sabio a maprobitsar met dagiti adda padada a Flatbed Dryer nga asosasion iti ili ti Cabugao tapno makatulongda met iti panggep ti Gobierno Lokal, OPAG-Ilocos SZur ken ti DA-RFO 1 a pannakasaranay dagiti mannalon iti pannakailako dagiti produktoda iti nainkalintegan a presio. # (Web In-Action)
No comments:
Post a Comment