Cabugao, Ilocos Sur – Intulod dagiti kameng ti Pamilia-LGU Cabugao ti imahen ni Patron San Markos Ebanghelista iti uneg ti Simbaan Romano Katolika ket inturongda iti pakaiplastaran ti Patron ti Ili iti imatang ti kaaduan ken dagiti kameng ti Pamilia-LGU nga idauluan ni Mayor Edgardo “Ediboy” S. Cobangbang, Jr. idi Abril 16, 2015.
Kabayatan iti panagtalinaed ti Patron ti Ili iti Munisipio iti unos ti dandani a makatawen (Abril 28, 2014-Abril 16, 2015) ket naikkan iti naan-anay a pannakarespeto babaen kadagiti naangay a Novena, Vigil ken binulan a Misa nga inannong dagiti Parish Priest ti Cabugao Catholic Church.
Sakbayna, babaen ti Pammilin ti Opisina ti Ama ti Ili idi Abril 7, 2014 ket naipakaammo kadagiti amin a kameng ti Pamilia-LGU a napusgan iti Tawen 2014 nga agbalin a “Hermana Mayor” ti LGU-Cabugao ket makipagyan ti Imahen ni San Markos Ebanghelista iti makatawen ditoy Munisipio.
Kalpasan ti Misa, naangay iti panagtataripnong dagiti Empleado ken agraman dagiti Opisiales ti Ili babaen iti naaramid a salu-salo iti uneg ti Munisipio.
Nairuknoyan met iti Novena ti nadakamat a Patron sakbay a naipan iti Simbaan ken naaramid ti sapasap a panagkararag dagiti kameng ti Pamilia-LGU iti uneg ti Simbaan. # (Web In-Action)
No comments:
Post a Comment