Cabugao, Ilocos Sur – Ti grupo ti Clean and Green Program ti Munisipio ket as-asikasuenna dagiti Pasilidad ti Munisipio (Parke ken Plaza) tapno naan-anay iti pannakalinis ken pannakapapintasda a mabuya ti aglawlaw.
Kangrunaan a maikkan ti mentenansia ket iti Cabugao Central Park (CCP) a daydaywen ti umili ken bisita iti aldaw ken sardam ken kangrunaan a disso a pakaangayan/pagpabuyaan dagiti aktibidades iti panagpiesta ti ili iti Abril 21-26, 2015.
Iti sabali a bangir, agtultuloy met a mamantener dagiti pasilidad nga usaren ti sapasap nga aggatang iti NISTC Public Market. Babaen iti panangilungalong ti LGU-Cabugao nga idauluan ni Mayor Edgardo “Ediboy” S. Cobangbang, Jr., napatakder ti dua a kabarbaro a Comfort Rooms (CR) iti likud ken sango ti pasdek-NISTC Public Market tapno adda madadaan nga usaren ti publiko kabayatan nga addada a gumatgatang iti Tiendaan.
Segun ken ni MENRO Edgar S. Balangatan, AT, agak-akem a dadaulo ti grupo a monmonitorenda latta iti Cleanliness and Beautification dagiti Barangays a papanan pay pagpasiaran dagiti Balikbayans/bisita iti summer months babaen iti pannakikammayetda kadagiti Opisiales ti barangay kadagitoy a lugar.
Kanaig daytoy, aktibo met iti Kapolisan ken ti MDRRMC-WASAR Team a mangtartarabay kadagiti Turista kadagiti Beaches ken Resorts ken aniaman a paguummongan ti tao kadaytoy a summer vacation.
Kalpasan ti Flag Ceremony idi Abril 13, 2015, impalagip ni Mayor Edgardo “Ediboy” S. Cobangbang, Jr. a kangrunaan nga aywanan ti Kapolisan ken BFP ti linak ken talna nangruna idiay disso ti Pagperiaan nga asideg ti Foodcourt ken ti NISTC Public Market kabayatan iti pannakiperia dagiti tao iti aldaw ken rabii.
Dagitoy nga aksion ken inisiatiba ket paset ti Direktiba ti Local Chief Executive ti ili iti agtultuloy a panangpapintas iti aglawlaw iti ili a pagsayaatan ken pakairanudan iti sapasap ken panagsagana para iti panagrugi ti piesta ti ili ti Cabugao inton Abril 21-26, 2015. # (Web In-Action)
No comments:
Post a Comment