Thursday, September 3, 2015

2nd BATCH TI RICE PROCESSING SKILLS TRAINING, NAGSANAYDA

Cabugao, Ilocos Sur – Naaramid manen  ti One-Day Rice Cracker Skills Training  para kadagiti 2nd Batch 4 P’s Beneficiaries manipud iti Brgy. Cuantacla, Carusipan, Cacadiran, Catucdaan ken Cael-layan, Cabugao, Ilocos Sur iti Agosto 28, 2015 iti  Cabugao Cultural and Sports Complex, Brgy. Rizal,  Cabugao, Ilocos Sur.


Nakikaysa da MSWD Officer Mrs. Lydia S. Gazmen; SBM Atty. Bryan Jett S. Pano, Committee Chairman on Social Services; Municipal SLP Focal Person Wilma S. Cruz  ken dagiti MSWDO Staff iti panagrugi ti panagsanay.

Kalpasan a nailawlawag ni Ms. Gloria T. Torres, College Extension Coordinator, MMSU-Laoag City iti panggep ken aramiden dagiti agsanay,  naangay a dagus ti Hands-on wenno aktual a panagadal/panagsursuro  iti inaramid dagiti nagsanay babaen iti papanda a mismo iti nakaiplastaran ti pagaramidanda iti rice cracker. Kangrunaan a Trainor a nagidemonstrar kadagiti nagsanay iti aramidenda ket ni Ms. Fairie Anne P. Acebedo ken ni Mr. Ralph Kevin S. Barolo ken naggapuda iti MMSU-Laoag City, College of Industrial Technology. 


Nagatendar ni  Mayor Edgardo “Ediboy” S. Cobangbang, Jr. iti panagleppas ti panagsanay. Imbaga ni Mayor Ediboy a kaduada a makipagyaman iti DSWD, MMSU Staff  ken iti TESDA kadaytoy a naited nga adal kadakuada ket kunana pay a  lalaingenda nga ipakat ti naadalda ket pinagyamananna ta nalakada a nakasursuro ket impalagipna a nakagasgasat dagitoy a nagsanay ta awan ti makaagaw ti inadalda uray kaano man  ken naikkanda pay  kadagiti naiyawidda a ramit para itoy a pinagsanayanda. 


Iti pannakiuman ti Web In-Action ken ni Mr. Dennis Aguimbag, SLP/Project Development Officer III ti DSWD, kinunana a kangrunaan a panggep ti programa a tulongan dagiti 4 P’s a mangidur-as iti kabaelanda iti matarusanda  a pagkakitaan. Mangnamnama ti Opisial ti DSWD a mataginayon dagitoy a proyekto a maited babaen iti napintas a panagtinnulong ti Ahensia ti DTI, TESDA, MMSSU,  LGU-Cabugao  ken kadagiti maseknan a nagsanay babaen  itoy a  proyekto.

Insupusop pay ni Mr. Aguimbag nga agtultuloy ti Sustainable Livelihood a programa ti DSWD ditoy nga ili. # (Web In-Action)

No comments:

Post a Comment