Cabugao, Ilocos Sur – Iti pannaki-amad ti Web In-Action idi Setiembre 8, 2015, imbaga ni Municipal Rice Program Coordinator Nereo S. Daproza, AT, nga adda 4,399 a bilang ti nakatalon iti Wet Season 2015 (Hunio-Nobiembre).
Innayon Municipal Rice Program Coordinator Nereo S. Daproza, AT a matutoren dagiti mannalon iti pannakaiturong ti padanumanda ta adda dagiti makinaria nga inted ti LGU-Cabugao kasta met dagiti hose a pagsisinnublatanda nga usaren tapno mapasay-akanda ti talonda uray iti masakupan ti adda irigasionna ken adda bubon wenno small farm reservoir-da.
Iti masakupan ti adda agtultuloy a pananumanna kas iti irigasion, kuna ni Mr. Daproza nga umabot ti 1,582 Ektaria ti naraepan idinto ta 616 Ektaria met ti Rainfed Area ken 44 Ektaria iti nainayon a namulaan ti pagay. Agdagup iti 2,242 Ektaria ti bilang ti natalon.
Kabayatanna, impakaammo ti Municipal Rice Program Coordinator ti Cabugao nga agtultuloy latta iti panagbisitana kadagiti barangay ken iti disso dagiti Techno-Demo ti Hybrid ken Certified Seeds agraman iti Seed Production Area tapno maiwanwanna dagiti mannalon (Cooperators) ken kakaduana a Destino a Teknisian ken aktual a maalana ti pakaseknan dagiti mannalon.
Dagitoy nga aksion ken inisiatiba ket maigapu iti agtultuloy a suporta ti LGU-Cabugao iti Agrikultura iti liderato ni Mayor Edgardo “Ediboy” S. Cobangbang, Jr. tapno maragpat latta ti “Rice Sufficiency Status” para kadagiti umili ti Cabugao, Ilocos Sur. # (Web Situational Report)
No comments:
Post a Comment