Thursday, September 10, 2015

DEWORMING, AGTULTULOY A MAARAMID KADAGITI BARANGAY

Cabugao, Ilocos Sur – Iti pannaki-amad ti Web In-Action ken ni Acting Municipal Agriculturist Robert Sabio Savella idi Setiembre 9, 2015, imbagana nga agtultuloy ken idadauluanda ken ni  Dr. Melvin G. Castro, DVM,  Municipal Livestock Coordinator  ti DA-LGU Cabugao iti panagpurgada   kadagiti ayup ken dinguen (Baka, Nuang ken Kalding) kadagiti 33 a barangay ti ili tapno masigud a maprebentaran dagiti rumsua a sakit ti animales.

Innayon ni MA Savella a makikokoordinarda iti Barangay Captain ti papananda a barangay ta kabaelanda a mobilisaren dagiti adda ayup ken dinguenna tapno matamingda iti mammaminsan nga eskediul.  

Malaksid iti ragup a kas iti grupo/barangay  a panagpurga ti Large Cattle ken Kalding ket maangay met latta  iti indibidual a wagas nangruna kadagiti adda sakit ti dinguen ken ayupda a kasapulan pay a makita ken maagasan.

Dagitoy nga aksion ken inisiatiba ket resulta iti agtultuloy a programa ti Animal Care and Disease Prevention ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno naan-anay a maidur-as ti livestock  sector  babaen iti pannakapapigsa ti  panagtaraken kadagiti ayup  a katulongan iti panagmulmula a pamastrekan dagiti mannalon ken umili. # (Web In-Action)

No comments:

Post a Comment