Cabugao, Ilocos Sur – Nagleppas ti School-Based Vaccination ti DOH iti Grade 1 ken Grade 7 iti intero a pageskuelaan-Elementaria ken High Schools iti ili babaen Iti panangidanon dagiti Medical Personnel ti Rural Health Unit (RHU)-Cabugao ken RN-Heals Nurses iti serbisio Iti panagbakuna iti “Anti-Measles (Rubella); Diptheria-Tetanus Vaccine”.
Maibasar iti report ti RHU-Cab ugao, naballigi ti naiwayat a panagbakuna ngem masunotan ti maikadua a daras dagiti nabakunaan ti Anti-Measle (Rubella) a Grade 1 Pupils iti umay a bulan tapno makompleto ti bakunada.
Kabayatanna, pinasingkedan dagiti pannakabagi ti RHU-Cabugao a narasay ti insidente ti Dengue maigapu ta naadalanen dagiti umili iti naan-anay a panangliklik iti pakaigapuan ti nasao a sakit babaen iti agtultuloy a panangtarabay ti LGU-Cabugao ken ti Departamento ti Salun-at (DOH) kadakuada.
Nadakamat dagiti nasamay nga addang a pinanglappedda iti Dengue Occurrence iti kallabes ken iti agdama a kas iti sumaganad:
1. Iraman dagiti RHU Personnel a maibagbaga iti kada pasienteda iti inaldaw iti nasken nga aramidenda tapno maliklikan ti pannakakagat ti agranggas a lamok ken no kasano a paksiaten ida.
2. Naiwayat ti nasaknap nga “Oplan Taob” a kangrunan a kinatinnulong ti DOH-LGU, MDRRMC ken dagiti Opisiales ti Konseho iti barangay ti ili.
3. Nakoordinarda kadagiti ospital pribado/pampubliko iti uneg ti ili kasta metten kadagiti kadarapat nga ili tapno ti maseknan a kinapet ti dengue nga agnaed ditoy nga ili ket matulongan pay a mangsaranget kadayta a sakit.
4. Nawarasan ti amin a household ti barangay iti OV-Trap iti kallabes tapno masigud a makeltay ti itlog ti lamok a mangpataud ti dengue no mapalusposan a dumakkel daytoy.
5. Maaramat pay ti de-fogging iti apektado a disso no nasaknapen ti panagwaras dagita a makadangran a lamok.
6. Agtultuloy a kooperasion ti tunggal Ahensia a manglapped iti itataud daytoy a sakit. # (Web In-Action)
No comments:
Post a Comment