Cabugao, Ilocos Sur - Iti pannaki-amad ti Web In-Action idi Setiembre 12, 2015, imbatad ni Dr. Bernardino P. de Gracia III, Medical Officer III iti Rural Health Unit (RHU)-Cabugao a kalikagumanna a maaksionan a daras ti pakaseknan ita ti sapasap maipapan iti panagraira ti dengue ken dadduma pay a pakaseknan ti salun-at dagiti umili ti Cabugao.
Babaen iti direktiba ti Departamento ti Salun-at (DOH) iti pannakataming iti salaknib dagiti ubbing ken umili kadaytoy a sakit, kinasarita ni Dr. De Gracia ti amin a Medical Personnel iti RHU-Cabugao nga ukkonenda ti rekord dagiti biktima ken pasiente ti “dengue” uray iti barangay no adda man tapno mairaman iti pakabuklan ti tignay-medikal a maigannuat a pangtiped kadaytoy a sakit. Innayon ni Dr. De Gracia a babaen iti pannakaasikaso ti masakit iti dengue ket saanen a maipannuray pay laeng a maipan kadagiti ospital nga addaan iti mayataday a ramit iti ruar ti ili.
Iti kasta, madagdagus a maagasan ken mataripato ti masakit. Insupusop pay ni Dr. De Gracia a nalpasdan a naipatungpal kadagiti barangay ti “Operation Taob” a panangibukbok kadagiti naurnong a danum/tudo kadagiti goma, bote ken lata tapno saan a pagitlogan ti lamok ken ar-aramidenda latta ti information initiatives kontra iti dengue. Panagdaldalus ti aglawlaw ken madalusan dagiti nasamek a disso a posible a pagyanan ti lamok ti kaskenan a maaramid ita. Sumarsaruno ti defogging a mausar a pangkontra ti makadangran a lamok no kumaro ti situasion.
Dagitoy nga aksion ken inisiatiba ket gubuay ti nasamay a programa iti pananglapped ti panagsaknap manen ti nadakamat a sakit babaen iti panangitandudo ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno masalbar dagiti umili nangruna dagiti ubbing iti pannakakagat ti agdangran a lamok. # (Web In-Action)
No comments:
Post a Comment