Thursday, May 26, 2016

1st BATCH TI SPES, INAWATDA TI SUELDODA

Cabugao, Ilocos Sur –  Awaten dagiti agtutubo nga agtrabaho iti maipatungpal nga  Special Program for the Employment of Students (SPES) a nagbuligan nga inggannuat ti Department of Labor and Employment (DOLE)-Vigan City ken  ti LGU-Cabugao para kadagiti agkasapulan ti trabaho nga agad-adal ita a  bakasion 2016. 


Inawat ti First Batch (21 nga agad-adal) ti gatad a  kaibatogan ti bayad ti serbisioda manipud iti HRM Office ken iti babaen ti panangaprobar ni Mayor Edgardo “Ediboy” S. Cobangbang, Jr.  iti panagtrabahoda manipud iti Abril 4, 2016 agingga iti Mayo 16, 2016. 

Inyawat ni Mayor Ediboy dagiti gunggonada a nagtrabaho kadagiti SPES Employees idi Mayo 24, 2016 iti Opisina ti Municipal Mayor a kaduana ni Ms. Angelina Esteban, HRMO Staff. Ti naited ket pakabuklan ti 60% a mabatayan ti LGU-Cabugao idinto ta iti 40 % ti ited met ti DOLE-Vigan City.

Maibatay  iti rekord ti Human Resource Management Office (HRMO) ti LGU-Cabugao nga idauluan ni Ms. Teresita S. Sison, HRM Officer, umabot ti 35  nga estudiante ti naikkan  iti trabaho ita a  Summer Vacation 2016   ket agtrabahoda kadagiti Opisina iti nadumaduma a Departamento ti LGU a nakaidesignaranda. 30 nga aldaw ti naituyang a panagtrabaho ti tunggal maysa kadagitoy a nagaplikar nga estudiante a naggapu iti nadumaduma a pageskuelaan ti kolehio ken barangay ti ili.  

Iti pannakiuman ti Web In-Action kadagiti estudiante iti Mayo 26,  2016, imbatad dagiti  immawat  ti kantidad nga agyamyamanda unay  iti LGU-Cabugao ta dakkel ti maitulongna iti 30 nga aldaw a panagtrabahoda  a nakateggedanda  iti nayon ti gastosenda nga agbasa. 

Kabayatanna, nangrugi met ti 14 a bilang ti 2nd Batch SPES Employees idi Mayo 16, 2016 ken agpatingga da inton Hunio 24, 2016. Maikkanda met iti sag-30 nga aldaw a panagtrabaho ket awatendanto  met iti maipada a pribilehio a kas iti 1st Batch. (Web In-Action)

No comments:

Post a Comment