Cabugao, Ilocos Sur - Maangay manen ti tallo nga aldaw a Training-Workshop iti Bantay Dagat (Deputization of Fish Warden) a pagpartisiparan dagiti mangngalap kadagiti coastal barangay ti ili ken dagiti pannakabagi ti DA-LGU ket maangay iti Mayo 4-6, 2016 iti Municipal Conference Building, Cabugao, Ilocos Sur.
Daytoy a gannuat ket paset ti programa ti BFAR (Regional & Provincial) ken iti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti agtultuloy a pannakataming iti pakaseknan ken pagsayaatan dagiti mangngalap ken pannakasaluad ti pagkalapan dagiti umili iti kabaybayan ti ili a Cabugao.
Indauluan ni Acting Municipal Agriculturist Robert S. Savella dagiti Staff Personnel ti DA-LGU a timmulong ken nagatendar iti panagrugi ti nadakamat a seminar.
Impeksa dagiti ag-training ta agtultuloy latta ti pannakaipaganetget ti pannakatagiben ti kabaybayan ti ili babaen iti tulong ti Gobierno Munisipal ken iti DA-BFAR Regional Office 1 nga idauluan ni Regional Director Nestor Domenden, CESO V.
Nagyamanda pay iti pannakanayon ti bilang ti Deputized Fish Warden a maikkan ti bileg nga agipatungpal ti pagannurotan iti pannakamantener ti umisu a panagkalap ken panangaywan iti rekursos iti kabaybayan ti ili.
Sakbayna, naangay ti immuna a tallo nga aldaw a seminar-workshop ti Bantay Dagat (Deputization of Fish Warden) a nagpartisiparan idi ti 32 a mangngalap, 6 a Barangay Captains ti 7 a Coastal Barangays ken tallo a pannakabagi ti DA-LGU a naangay idi Oktubre 26-28, 2011 sadiay Multipurpose Hall, Barangay Sabang, Cabugao, Ilocos Sur.
Iti daydi tallo nga aldaw a panagsanay, nadiskutir dagiti topiko a kas iti sumaganad: Fishing Gear and Fishing Method, Fishery Laws, Anatomy of Blasting Fish, Internal and External Manifestation of Blasted Fish, Criminal Procedures ken Values Education.
Dagiti nagatendar idi a pannakabagi ti Regional Staff ti DA-BFAR Region 1 ket dagiti sumaganad: Teresita Hidalgo, Mary-ann Salomon, Belmor Bugaoan, Henry Cantas, Victoria Lopez ken Melody Sienda.
Dagiti met pannakabagi ti DA-BFAR Provincial Office ket isuda Rogelio Ragonjan, Benedicto Seraos ken Florence Soria. # (Web In-Action)
No comments:
Post a Comment