Monday, May 16, 2016

NATALNA NGA ELEKSION, PINADAYAWAN NI MAYOR EDIBOY

Cabugao, Ilocos Sur – Kalpasan ti Flag Ceremony iti Mayo 16, 2016, kinablaawan ni Mayor Edgardo “Ediboy” S. Cobangbang, Jr. dagiti katinnarabayna nga Opisiales-Lokal ti Ili, Department/Section  Heads dagiti Opisina ti LGU  ken dagiti amin a Personnel a mangbukel ti Pamilia-LGU Cabugao iti nasayaat a panagrubuat ti panagtarabahoda iti umuna a Lunes kalpasan ti Eleksyon 2016.

Dinakamat ni Mayor Ediboy ti kinatalna ti napalabas nga Eleksion ditoy  ili a Cabugao ket kinomendaranna dagiti kameng ti Kapolisan; Multiplier Force a kas iti kameng ti  BFP ken BPATS kadagiti barangay iti kaawan a pulos ti napasamak nga insidente a mainaig iti pannakaangay ti panagpipili ti Opisiales Lokal iti las-ud ti Election  Period.

Impeksa ti Ama ti Ili ti ragsakna ta parte iti Administrasionna  iti agtultuloy a kinatalna ti panagpipili ken napintas a pagrubuatan iti sumaruno nga administrasion ti ili.

Dinakamat pay ni Mayor Ediboy iti pannakabukel ti Transition Committee a mangisagana iti aktibidad a mangsakup iti panaginnallawat ti Takem iti agdama nga administrasion kadagiti sumaruno nga agtakem nga Opisiales Lokal ti ili nga idauluan ni Mayor-Elect Josh Edward “Ediboy” S. Cobangbang.

Dadduma pay a naipadamag ket iti naannayas a panagakar iti pagyanan dagiti mangbukel kadagiti Opisina ti Munisipio maigapu iti pannakaaramid ti baro a Municipal Hall Building  ti ili.

Nairaman pay a naipakaammo iti panaglukat ken pannakaaramid ti eksamen dagiti ubbing ken agtutubo nga agad-adal a  para iti Cabugao Education Scholarship Program 2016. # (Web In-Action)

No comments:

Post a Comment