Cabugao, Ilocos Sur – Nagmonitor dagiti pannakabagi ti Konseho Munisipal ti ili a Cabugao, Ilocos Sur a pakaibilangan da Vice Mayor DJ Savellano; SBM Danny Q. Gazmen; SBM Vicky S. Serna; SBM Dr. Jemaima S. Tan-Yee; SBM Benedict M. Savellano; SBM Atty. Bryan Jett S. Pano; ken ni SBM Josefina S. Vallejo kabayatan a maipatpatungpal ti panagtrabaho dagiti Stakeholders ti Brigada Eskwela 2016 a buklen dagiti kameng ti PTA; Mangisursuro; Brgy. Officials; Cabugao Youth Organization iti pageskuelaan ti Cabugao North Central School nga idauluan ni Mrs. Estrellita M. Siruno, Principal II iti kabigatan ti Mayo 30, 2016 a kick off activity ti wenno umuna nga aldaw a pannakaaramid ti Brigada Eskwela.
Sakbayna, naaramid ti Kick Off Activity ti Brigada Eskwela 2016 ditoy Cabugao North Central School babaen iti naaramid a motorcade idi Mayo 30, 2016 kadagiti processional route ti ili ken iti National Highway a nangrugi iti Cabugao North Central School ken nagsubli met laeng ditoy dagiti nagpartisipar.
Kanaig daytoy, naiwayat pay ti motorcade ti DepED-Ilocos Sur manipud iti ili a Sinait agingga iti ili a Tagudin, Ilocos Sur kas pangkulminar iti nasao nga school weeklong maintenance program (Mayo 30-Hunio 4, 2016) babaen iti Tema nga: “Tayo Para sa Paaralang Ligtas, Maayos, at Handa Mula Kindergarten Hanggang Senior High School.”
Nakitinnulong met dagiti mangisursuro nga idauluan ni Mrs. Estrellita M. Siruno, Principal II kadagiti nagannak a nakipaset iti nasao nga aktibidad iti nadakamat a pagadalan.
Ti Brigada Eskwela ket tinawen a maang-angay a programa ti DepED a pakikammayetanna kadagiti maseknan a katinnulongda iti benneg ti Edukasion ket makalawas ti pannakaisagana dagiti pageskuelaan para iti panagseserrek ti klase dagiti ubbing iti bulan ti Hunio 2016. # (Web In-Action)
No comments:
Post a Comment