Cabugao, Ilocos Sur – Iti pannakiuman ti Web In-Action iti Waterworks Department, LGU-Cabugao iti Abril 23, 2016, imbatad ni Waterworks Supervisor Engr. Nestor B. Somera nga agtultuloy latta ti ipapaayda a serbisio kadagiti umili nga end-users ti danum a mainum nga aggapu iti Magarang Water Springs, Brgy. Cacadiran, Cabugao, Ilocos Sur ken iti Roma-Kinalian Sources iti Brgy. Maradodon ken Brgy. Catucdaan kadagiti service-barangays iti ili iti las-ud ti makadominggo.
Iti agdama, maipatpatungpal latta iti water rationing tapno maalay-ayan ti panages-es ti danum kadagiti masakupan ti service area ti waterworks iti suplay ti danum nangruna kadagitoy a bulbulan. Kabayatanna, adda met latta dagiti connection line ti tubo a tarimaanenda gapu iti panagrukop wenno dadduma pay a pakaigapuan ti panagproblema iti main line ken distribution line. Ngem maaksionan a daras dagitoy ta agtultuloy iti repair and maintenance ti Opisina ti Cabugao Waterworks.
Innayonda pay nga aksionanda dagiti awag dagiti water-users ta inaldaw a nakasapulan ti danum.
Insupusopda a madagdagus a mataming ti pakaseknan dagiti water consumers agsipud ta kankanayon latta met ti panagrekurida/monitor dagiti Collectors, Pifefitters ken Personnel a masakupan ti Cabugao Waterworks System.
Segun kadakuada a tinawen a mapasamak dagiti posible a pakaigapuan ti panages-es ti suplay ti danum ket kangrunaan iti napaut a tikag; panagadu ti bubon a panglakagan dagiti agmulmula no panawen iti tikag ken mainayon manen a user nga agusar iti suplay a danum manipud iti paggapuan ti suplay ti mainum a danum. # (Web In-Action)
No comments:
Post a Comment