Monday, December 18, 2017

FAMILY DEVELOPMENT SESSION (FDS) TI 4 Ps, AGTULTULOY A MAIPATUNGPAL

Cabugao, Ilocos Sur –  Iti pannakiuman ti Web In-Action, impakaammo  dagiti Staff ti  Opisina ti Municipal Operations  Office (MOO) ti 4 Ps Program, Municipal Link-Cabugao nga itultuloyda nga isaksaknap  ti pakabuklan ti programa ti  Salun-at ken Nutrision iti  pagnaedan dagiti kameng ti 4 Ps kadagiti barangay ti Munisipalidad ti Cabugao ket sinapasapda nga inadalan dagiti 4 Ps itay bulan ti Nobiembre 2017.  

Naballigi ti resulta iti naiyadalda a Topiko. Itatta a Disiembre 2017, ti Topiko a maiyadal ket napauluan iti  “Information Education Campaign RA 8504, Philippine AIDS Prevention or Control Act of 1998”

Innayonda a makiko-koordinarda  latta kadagiti Opisiales ti Barangay/Parent Leaders  a katinnulongda  a mangorganisar iti Family Development Session (FDS) para iti Topiko nga imitingda kadagiti 4 Ps para iti dayta a bulan.

Iti manon a bulan a pannakaangay ti Family Development Session (FDS) kadagiti barangay ket nasursuron dagiti Parent-Leaders ti tumakder iti bukodda a panangtarawidwid iti miting ken seminar iti masakupanda.

Ita a bulan  ti  Disiembre 2017, dagiti kameng ti Nurses Deployment Program (NDP) iti RHU-DOH Cabugao iti aglektiur (Learning Service Provider)  kadagiti FDS Session-da ket napagkaykaysaanda a maysa a Topiko latta ti binsaenda kadagiti Family Development Session-da tapno nadardaras a maawatan dagiti kliente ken  epektibo iti maaramid nga evaluation a maisayangkat kalpasanna. Nalaklaka pay a maawatan dagiti adalanda a 4 Ps no dagitay kabisadoda/naipanawen  a Topiko/Situasion  iti maiyad-adal kas parte  iti Values  Formation ti Programa.

Dagitoy nga aksion ken inisiatiba ket maigapu iti agtultuloy a panangtarabay kadakuada ti Gobierno Munisipal iti panangidaulo ni Mayor Josh Edward S. Cobangbang iti pannakikammayetna iti Ahensia ti DSWD iti napintas a maaramidan dagiti programa a maisaksaknap kadagiti barangay tapno maragpat iti sapasap a panagrang-ay iti Pamilia ken umili.  # (Web In-Action)

No comments:

Post a Comment