Wednesday, December 6, 2017

DIVERSION DAM KEN TERUVIAN INTAKE TI NIA-GACO, NAINAGORARAN

Cabugao, Ilocos Sur –  Nainagoraran ti naileppasen a Diversion Dam ken Teruvian Intake babaen iti pannakagetteng ti ribbon nga inannong ni Mayor Josh Edward S. Cobangbang agraman dagiti Opisiales ti Ili ken Opisiales/Lumugar iti nadakamat a barangay nga idauluan ni Brgy. Captain  Melito Charito S. Siruno iti Barangay Cacadiran. Naaramid ti inagorasion idi Disiembre 1, 2017 a maysa kadagiti nangkulminar iti selebrasion ti panagkasangay ti Ama ti Ili a Cabugao. IIlocos Sur.


Segun ken ni Mr. Ronald Bersola, Institutional Development Officer ti NIA-Irrigation  Management Office (IMO) ken makasakup iti Gaco Irrigation Project (GIP), Brgy. Cacadiran, Cabugao, Ilocos Sur nga  iti nasao a Diversion Dam ket maserbisyuanna ti umabot iti 1,200 Ektaria  a pagtatalonan iti 13 a barangay a kas iti Cacadiran; Cuantacla; Nagsincaoan; Lipit; Arnap; Turod Patac; Cuancabal; Sagayaden; Baclig; Rizal; Bonifacio; Quezon ken ti Pila nangruna iti Wet Season Crop (Hunio-Nobiembre) iti kada Tawen.

Maipalagip a a narugian ti Gaco Irrigation Project ti National Irrigation Administration (NIA) ket  napuros ti danumna kadagiti tributaries  ti Cabugao River manipud iti Barangay Cacadiran, Cabugao, Ilocos Sur idi Tawen 2012. 

Naisaruno ti pannakabuangay dagiti Turnout Service Area Group (TSAG) iti 13 a barangay a masakupan ti irigasion tapno mabukel dagiti Irrigator’s Association (IA) a nairehistro kalpasanna  iti Securities and Exchange Commission (SEC) idi Tawen  2013.

Kabayatanna, nakikoordinar ni Mr. Ronald Bersola, Institutional Development Officer ti NIA-Irrigation  Management Office (IMO) ken makasakup iti Gaco Irrigation Project (GIP), Brgy. Cacadiran, Cabugao, Ilocos Sur  kadagiti opisiales dagiti nadakamat a barangay agraman dagiti asosasion ti mannalon ket naorganisar ti TSAG ken napederasion dagiti mangbukel ti IAs. 


Idi Hunio 10, 2013, narugian ti seminar iti “Capability Enhancement Training in Managing the Irrigation System (CETMIS). Pinagyamanan ni Mr. Elpidio Sonido, Magarang FIA President ta naikkanda iti adal no kasano a tamingenda iti operasion ken  mentenansia  ti kanal ken iti panagpadanumda babaen  iti panangtarabay ti Opisina ti NIA (ISIMO)-Sta. Maria, Ilocos Sur nga idauluan ni Engr. Adriano F. Amano, MPA, Division Manager A.

Inlawlawag idi ni Mr. Bersola ti akem ti TSAG a mabukel a kas sanga ti IA tapno naannayas ti operasion ken mentenansia ti kanal apaman nga agoperar.

Nabuangay met ti System Management Committee (SMC), kangrunaan a Komite a katinnulong ti Gaco National Irrigation System (GNIS)  a mangtarawidwid iti Operation and Maintenance  iti maserbisyuan a barangay ti ili iti Cabugao, Ilocos Sur idi Mayo 2014.

Nagatendar idi dagiti Opisiales dagiti tallo nga umuna a nabuangay nga Irrigator’s Association (IA)  kabayatan iti pannakatarimaan dagiti pasilidad ken istraktura iti nasao a pagpadanuman a kas iti Magarang Farmer’s Irrigators Association, Cuancabal-Nangaraban IA ken ti Rizal-Baclig IA.

Naaramid pay ti panagsanay iti Financial Management Seminar dagiti mannalon a masakupan ti NIA-Gaco National Irrigation Project (NIP) kadagiti Barangay ti Nagsincaoan, Cacadiran, Arnap, Lipit ken Cuancabal, Cabugao, Ilocos Sur  iti Function Hall, NIA-Gaco-NIP Building, Sitio Cabaroan, Brgy. Cuancabal, Cabugao, Ilocos Sur iti dayta met la a Tawen 2014.

Innayon ni Mr. Bersola a kasapulan a matun-oyan dagiti plano ti Ahensia a pannaka-organisar dagiti maseknan nga IAs tapno adda kakinnoordinarda iti pannakaiwayat ti konstruksion dagiti kanal iti masakupan dagiti nadakamat a barangay ken katinnulongda iti panagoperar ti kanal.

Ti pannakaorganisar ken pannakapatibker dagiti Irrigator’s Associations (IAs) ket paset iti panagoperar ti Gaco Irrigation Project (GIP) a nagun-od a proyekto ti ili a Cabugao babaen iti liderato ni Pasado Mayor Edgardo “Ediboy” S. Cobangbang, Jr.  ken maitultuloy iti agdama nga Administrasion ti LGU-Cabugao nga idauluan ni Mayor Josh Edward S. Cobangbang ken iti Departamento ti Agrikultura (DA) ken kasta metten iti National Irrigation Administration (NIA) a mangbenepisiar kadagiti barangay ti ili a maserbisyuanna.

Ti Gaco NIS ket addaanen iti 1,200  Ektaria  a kalawa ti  matalon (Firm-up Service Area) nangruna iti Wet Season Crop (Hunio-Nobiembre) iti kada Tawen  a suksukayen met ti 1,968  a bilang ti  mannalon. Daytoy ket buklen ti innem nga Irrigator’s Association (IAs) a  kas iti Magarang FIA; Cuancabal-Nangaraban IA; Patac-Alina-ay IA; Rizbac IA; Sagayaden Cabugao Ilocos Sur IA ken PIDAR IA ken 32 a Turnout Service Area Group (TSAG) a mamagkaysa  ti  pamurosanda a kanal iti pagpadanumanda kadagiti pagtatalonanda. # (Web In-Action)

No comments:

Post a Comment