Cabugao, Ilocos Sur – Nagun-od ti LGU-Cabugao nga idauluan ni Mayor Edgardo “Ediboy” S. Cobangbang, Jr. ti pammadayaw iti “Outstanding Municipalities in the CY 2013 Agri-Pinoy Rice Achiever’s Award” manipud iti Department of Agriculture (DA)-National Rice Program.
Kanaig daytoy, maikkan ti Cash Award ti ili ti Cabugao nga agpateg iti One Million Pesos (P1,000,000) babaen iti porma ti proyekto iti naregget a pannakipasetna iti pannakaital-o ti produksion ti irik iti Region 1 iti Tawen 2013.
Segun ken ni Municipal Engineer Crescencio Marcos C. Formoso a maiproyekto daytoy a gunggona ti ili iti pannakapasayaat ti Farm-to-Market Road (FMR) iti Brgy. Bato-Cael-layan Road babaen iti panangaprobar ni Mayor Ediboy.
Iti miting ti Local Development Council (LDC) a nagpartisiparan dagiti pannakabagi ti amin a sektor iti Munisipalidad ti Cabugao idi Marso 12, 2014, imbatad ni Mayor Ediboy a maysa iti pannakasemento ti amin a kalsada ti barangay ti prayoridad a programa ti Gobierno Lokal ket impeksana ti panagyamanna iti DA ken iti agtultuloy a panagtalek dagiti umili iti pannakikaysada iti LGU-Cabugao iti pannakagun-odna daytoy a pammadayaw a mangnayon iti proyekto-impraestruktura a mangpanam-ay ti panagdaliasat dagiti umili nangruna kadagiti agindeg kadagiti barangay. # (Web In-Action)
No comments:
Post a Comment