Cabugao, Ilocos Sur - Nai-turnover ti kompleto a pakabuklan ti lima a Payao Fishing Materials kadagiti lima nga asosasion ti mangngalap iti Barangay Namruangan, Cabugao, Ilocos Sur nga idauluan ni Brgy. Captain Robertson “Bongbong” R. Gorospe idi malem ti Marso 4, 2014 ket naangay ti panagtitipon iti Covered Court ti nasao a barangay.
Indauluan da Governor Ryan Luis V. Singson ken ni Mayor Edgardo “Ediboy” S. Cobangbang, Jr. iti nangiyallawat kadagitoy a ramit-pagkalap kadagiti dadaulo ti lima nga Asosasion a managanan: San Pablo Fishermen Association; Pagkakaisa FA; Wagayway FA; Saranay FA ken ti Pag-asa FA.
“Dakkel a tulong daytoy kadakami a mangngalap ket aywananmi ken ipategmi para iti pamiliami ken iti komunidadmi. Agyamankami unay kada Governor Ryan ken ni Mayor Ediboy,” kinuna ni Kagawad Marcelino Antoc ti Brgy. Namruangan.
“Agyamyamankami met kadagiti Opisiales ti LGU ken ti Provincial Government ta maikkankami manen ti pagsapulmi a makatulong iti pamiliami ken iti kaaduan” imbatad met ni Mr. Rolly Rabor, kameng ti Pagkakaisa FA.
Iti nadakamat a Turn-over, nakipaset met da Vice Mayor Deogracias Jose Victorino “DJ” H. Savellano ken ni ABC President, Brgy. Captain Thaddeus “Teddy” U. Soller.
Segun ken ni Kapitan Robertson R. Gorospe, umabot ti 250 ti miembros dagiti lima nga asosasion ti mangngalap a nabenepisiaran kadaytoy a proyekto iti pagkalap. Innayon pay ti Kapitan a nalaus ti panagyamanna kadagiti nangited kadaytoy a proyekto ta maisagut unay dagiti kabarangayanna iti patauden ti Payao a pagsapulanda. # (Web In-Action)
No comments:
Post a Comment