Cabugao, Ilocos Sur – Naaramid ti Inspeksion dagiti naipatakder a Flatbed Dryer manipud iti Engineering Division ti DA-Regional Field Office, San Fernando City, La Union idi Marso 13, 2014 iti lima a Farmers’ Associations (FAs) iti ili a Cabugao, Ilocos Sur.
Imbagian ni Engr. Noel Tubon, pannakabagi ti Engineering Division ti nasao nga Ahensia iti nagturong ditoy Cabugao, Ilocos Sur ket inasistiran ni Mr. Obas Bill Y. Baclig, AT, DA-LGU Cabugao a napan nangamiris kadagiti Post-Harvest Facilities a naipasdek iti Sitio Lusong Suyo, Brgy. Baclig, Brgy. Turod Patac, Brgy. Namruangan, Brgy. Bungro ken iti Brgy. Sagayaden.
Immuna a napanan ti grupo iti BACALL Multipurpose Association iti Sitio Lusong Suyo, Brgy. Baclig. Segun ken ni Engr. Tubon, panggep pay ti panangamirisda no maus-usar met laeng dagitoy a pasilidad ken maimbentario dagiti dadael a pasetna ket tumulong ti DA-RFO 1 a mangsukat kadagitoy a partes tapno agtultuloy a “Functional” ti nasao a pasilidad.
Kabayatan iti inspection, naibatad dagiti dadduma a takuat ti Inspector kas iti sumaganad:
1.Ti panagoperar ti Flatbed Dryer ket mangpataud ti pagsapulan dagiti miembro ken matgedan ti asosasion maibasar iti rekord a nakitana.
2.Show-window ti dadduma nga asosasion nga adda Flatbed Dryer-na ket adaptarenda ti estratehia/pamuspusan ti nalalaing nga Asosasion.
3.Ammoda nga ipateg ken ilalaen dagiti naited a ramit.
4.Bassit ti perdi ti panagoperar dagitoy a Flatbed Dryer.
Dagitoy nga aksion ken inisiatiba ket resulta ti napintas ken agtultuloy a panagkammayet ti LGU-Cabugao nga idauluan ni Mayor Edgardo “Ediboy” S. Cobangbang, Jr. a mangtartarabay kadagiti mannalon, ti DA-RFO 1, San Fernando City, La Union, DA-OPAG-Ilocos Sur ken dagiti Farmers’ Association ti ili tapno adda madadaan nga usaren dagiti mannalon kalpasan ti panagapitda nangruna iti pagay ken mais tapno magun-odda iti umisu a “Moisture Content” (MC) ti ilakoda a produkto ket makaganansiada ken masubbotda ti kapitalda a nagtalon. # (Web In-Action)
No comments:
Post a Comment