Cabugao, Ilocos Sur – Naangay ti Cash Card Distribution dagiti kameng ti Pantawid Pamilyang Pilipino Program (4 Ps) a nakabuklan ti 501 Grantees a nang-claim ti Cash Cards-da ken naggapuda iti 33 a barangays ti ili a Cabugao, Ilocos Sur. Naaramid ti pannakaited dagiti Cash Cards iti Opisina ti DSWD-4 Ps, LGU-Cabugao nga inimatangan dagiti pannakabagi ti DSWD Regional Office 1, dagiti kameng ti Municipal Link ti LGU-Cabugao ken ti Municipal Focal Person ti 4 Ps.
Iti nasao a Card Distribution, naawis a nangipaay ti Mensahe ni Mayor Edgardo “Ediboy” S. Cobangbang, Jr. ket kimmablaaw kadagiti umawat a 4 Ps Members ken Opisiales ti DSWD-Region 1 agraman dagiti mangiwanwanwan kadaytoy a Programa iti Munisipio.
Nagyaman ti Ama ti Ili ta dimteng manen daytoy a gundaway a pannakaited ti tulong kadagiti benepisiario nga umili. Pinalagipanna dagiti umili nga umaw-awat ti tulong nga itultuloyda nga aramiden dagiti pagrebbenganda a kas benepisiario ken agtultuloy a pannakasurot iti pakaiserbian dagitoy a tulong para iti edukasion ken salun-at dagiti annakda nga agbasbasa. Dinayaw ti Alkalde Munisipal iti agtultuloy a kinatulnog dagiti Recipients nga aramidenda dagiti pagrebbenganda ta awatenda manen ti mainayon a tulong ti programa a para kadakuada.
Segun ken ni Miss Jessie Ann O. Tabut, DSWD Municipal Link a kaaduan kadagiti immawat ti Cash Cards ket nangrugida idi Hulio 2013 agingga iti Disiembre 2013. Adda met umawat a nangrugi iti Setiembre ken Oktubre 2013 a dagitoy ket Late Registrants.
Dagiti mangbukel iti DSWD Region 1 a timmalantan iti nasao a Cash Card Distribution ket isuda: Ms. Maria Theresa N. Calvo ken ni Mr. Noel Baguitan, agpada a DSWD Municipal Roving Bookkeeper ken ni Ms. Teresita Pamintuan, Cash Card Focal. Nagasistir met da Miss Aida S. Cueto ken dagiti kakaduana iti Municipal Link Staff iti nasao a panagitedan ti Cash Cards. # (Web In-Action)
No comments:
Post a Comment