3RD CABUGAO MASS WEDDING, NAANGAY

Cabugao, Ilocos Sur – Naangay ti 3rd Cabugao Mass Wedding iti Municipal Conference Building idi Pebrero 28, 2014.

Iti panangrugi ti programa, immuna ti panagmartsa dagiti 26 a paris a nagkasar  a kinuyog dagiti ninong ken ninang a nagturong iti uneg ti Municipal Conference Building.  Naaramid ti Prayer babaen ken ni Miss Aida S. Cueto. Kalpasan ti pannakakanta ti Philippine National Anthem ken Cabugao Hymn, nangited ti Welcome Address ni  Vice Mayor Deogracias Jose Victorino “DJ” H. Savellano ket kinablaawanna dagiti 26 a paris nga agkallaysa. Nangibinglay met ti pammagbaga ti Bise Mayor kadagiti nagkasar.

Naisaganad ti Seremonia ti Kallaysa  ket  impaay ni Mayor Edgardo “Ediboy” S. Cobangbang, Jr. ti Bileg ti Panagkallaysa kadagiti 26 a paris a mangawat ti Matrimonia ti Kasar.

Iti Mensahe ni Mayor Ediboy, kinablaawanna dagiti nagkasar ken agraman dagiti nanganak, Sangaili ke kabagian dagiti nagkasar ken iti amin a naitallaong iti nasao a seremonia. Nangipaay ti pammagbaga ti Ama ti Ili kadagiti nagkallaysa ket pinagyamananna ti agtultuloy a panagtalekda iti Gobierno Munisipal. Innayon ti Alkalde Munisipal a mainayon dagiti nagkallaysa a  mangbangon iti responsable a Pamilia ken   umili ta iti Pamilia ti pundasion ti naurnos ken naprogreso pay nga ili ti Cabugao.

Nangipaay met ni Ms. Urbana Roman, Provincial Statistics Officer ti National Statistics Office (NSO) ket inapresiarna ti LGU Cabugao kadaytoy a proyektona kasta met iti episiente a panagtrabaho ti Local Civil Registrar ditoy nga ili iti pakaseknan ti pagrebbenganda kadagiti umili ti Cabugao.

Naaramid pay dagiti dadduma a Tradision ti Panagkallaysa babaen iti panangiwardas ni SB Secretary Maxfel S. Suboc sakbay iti Group Pictorial  dagiti nagkasar/nanganak ken ni Mayor Ediboy ken ti NSO Officer  iti uneg ti Conference Building.

Binagi ni SB Member Danny Q. Gazmen ti Closing Remarks. Nangipaay met ti Konsehal iti pammagbaga kadagiti nagkasar ken inlawlawagna ti dakkel a pagimbagan dagiti umili ken iti ili daytoy a proyekto ti LGU-Cabugao a Mass Wedding. # (Web In-Action)