Cabugao, Ilocos Sur – Nainagoraran ti kabarbaro a pasdek ti Marga-ay Day Care Center idi Disiembre 1, 2017 nga inatendaran dagiti Opisiales ti Ili nga idauluan ni Mayor Josh Edward S. Cobangbang. Ginetteng da Mayor Josh Edward ken ni Brgy. Captain John P. Simbe dagiti ribbon ken nabendisionan ti pasdek babaen ken ni Rev. Fr. Rex Rilveria, Assistant Parish Priest ti Roman Catholic Church.
Daytoy a pasdek ket maysa kadagiti dadduma pay a proyekto a nainagoraran iti dayta a petsa kabayatan iti pannakaselebrar ti panagkasangay ti Ama ti Ili.
Imbatad dagiti Opisiales ti Barangay ken iti Day Care Center a napintas ti panagtitimpuyog ti mangisursuro, nagannak ken kasta metten iti Barangay ken iti LGU ket daytoy ti kangrunaan a makagapu iti pannakaipasdek ti Day Care Center Building iti Barangay Marga-ay.
Innayonda pay nga adda 13 nga ubbing nga agdama a maisursuro kadaytoy a pagadalan. Dati a nakisalinongda iti panagklaseda iti maysa a pasdek ngem ita natalgeden ti pagyananda nga agklase ken adda makuna a kabukbukodanda a pagpusiposan ken extension iti likud ti nadakamat a pasdek.
Sangsangkamaysa ti mangisursuro, nagannak ken bumarangay nga idauluan ni Barangay Captain John P. Simbe iti panagyamanda iti Gobierno Munisipal nga idauluan ni Mayor Josh Edward S. Cobangbang iti pannakaipasdek ti nasao a Day Care Building.
Ni Ms. Marilou S. Sumibcay ti agdama a Child Development Worker ken idauluan met ni Ms. Rowena S. Discion, Presidente dagiti nagannak iti agad-adal nga ubbing. # (Web In-Action)
No comments:
Post a Comment