Cabugao, Ilocos Sur – Kalpasan ti Flag Raising Ceremony iti Pamilia LGU-Cabugao iti Disiembre 4, 2017 iti sango ti Rizal Barangay Hall, impakaammo ni Miss Mimi S. Sison, Human Resource Management Officer ti nagun-od ti Local Government Unit (LGU) Cabugao a Pammadayaw iti “2017 Seal of Good Local Governance” manipud iti Department of the Interior and Local Government (DILG).
Natudingan ni Mrs. Constancia L. Quinola, MLGO Officer ti LGU-Cabugao a nangipakaammo iti napateg a Pammadayaw ti LGU-Cabugao iti imatang ti pamilia LGU kasta metten kadagiti Opisiales ti Ili ken Barangay ken umili a nakipaset iti pannakaisa ti bandera iti dayta a gundaway.
Inawat ni Mayor Josh Edward S. Cobangbang iti 2017 Seal of Good Local Governance manipud ken ni Mrs. Quinola ken binayabay dagiti Opisiales ti ili nga isuda SBM Danny Q. Gazmen; SBM Vicky S. Serna; SBM Atty. Randy Baniaga G. Kinaud; SB Secretary Maxfel S. Suboc ken dagiti Department Heads nga isuda Municipal Treasurer Mrs. Lourdes A. Azcueta; MSWD Officer Mrs. Lydia S. Gazmen; Municipal Assessor Mrs. Lilia S. Flores; Municipal Accountant Mrs. Anna Lyn Siababa ken ni Municipal Civil Registrar Mrs. Rosario Charity S. Abara.
Iti panagsarita ni Mayor Josh Edward, kimmablaaw ken nagyaman iti daytoy a nagun-od a pammadayaw ti LGU-Cabugao. Kunana a daytoy ti maysa a kapatgan a sagut iti panagkasangayna iti Disiembre 1 ken bigbigenna a maigapu daytoy a pammadayaw iti napintas ken agtultuloy a timpuyog a panagtrabaho ti amin a maseknan iti pannakagun-od kadaytoy a balligi. Insupusopna a daytoy ti napigsa a pakakitaan wenno testamento iti napintas a pannakaimanehar ti Gobierno Lokal kadagiti umili ket mangnamnama a kadagiti sumarsaruno a pasalip ket magun-od manen ti ili a Cabugao iti ad-adu pay a pammadayaw babaen iti napintas a panagkaykaysa nga agtrabaho para iti kaaduan.
Naisaruno a napadayawan ni Mr. Henry Baclig Saliganan, Local Farmer Technician (LFT) ti DA-LGU Cabugao nga Outstanding Local Farmer Technician iti Region 1 ket napadayawan ni Mr. Saliganan iti naaramid a 2017 Local Farmer Technician Regional Congress and End-Season Review sadiay Lingayen, Pangasinan idi Nobiembre 22, 2017.
Inyawat ni Mayor Josh Edward ken ni Mr. Saliganan ti Plaque of Recognition iti panangabak daytoy ken binayabay kadagiti Opisiales ti Ili nga idauluan Mayor Josh Edward.
Kanayonan daytoy a pammadayaw ti Certificate of Recognition nga impaay ti Philippine Rice Research Institute (PhilRice) iti pannakapili ti Cabugao LFT Team a “3rd Best Presenter” iti naangay a 1st Ilocos Region LFT Congress and End Season Review a naangay iti Pangasinan Training and Development Center, Capitol Compound, Lingayen , Pangasinan idi Nobiembre 22, 2017.
Kabayatanna, gapu kadagitoy a gapuanan, inesponsoran ni SBM Atty. Randy Baniaga G. Kinaud, Committee Chairman on Agriculture ti Sangguniang Bayan Resolotion No. 87, Series of 2017 a nangited iti Certificate of Commendation ken ni Mr. Henry B. Saliganan iti panangabakna nga Outstanding Local Farmer Technician iti Region 1 kasta metten iti Cabugao LFT Team nga inted ti PhilRice. # (Web In-Action)
No comments:
Post a Comment