NAGSELEBRAR TI BARANGAY QUEZON ITI PIESTA 2017

Cabugao, Ilocos Sur – Nagselebrar dagiti lumugar  ti Barangay Quezon, Cabugao, Ilocos Sur nangrugi idi Disiembre 27, 2017 a no sadino a ditoy ket naidaton ti maysa a Nasantuan a Misa iti sardam ken simmaruno a naangay ti Basketball Competition Championship a nagpartisiparan dagiti nagsalip a Team.

Ti Disiembre 28 ti kaaldawan ti panagpiesta ti Barangay Quezon ket naangay ti Awarding kadagiti napagasatan iti naaramid a Miss Gay Quezon 2017 iti karabiyanna.

Ti Barangay Quezon ket maysa kadagiti uppat a barangay a nangbukel ti Poblasion ti ili a Cabugao, Ilocos Sur. Ditoy a nagsantak ti Iglesia Filipina Independiente (IFI), simbaan nga imbangon daydi Bishop Gregorio L. Aglipay, Military Vicar idi panawen ni Revolutionary President Emilio F. Aguinaldo ken nalatak a Labor Union Founder ken agiwarwarnak Isabelo de los Reyes. Tinarawidwidan daydi Bishop Apostol nga Ama daydi nag-Mayor Pacifico P. Apostol, patanor ti Barangay Quezon  a  nag-Alkalde  ti ili a Cabugao, Ilocos Sur.

Nagduduma ti pagbiagan ti lumugar ket nabenneg ti propesional, retirado, negosiante, mannalon, karpintero ken  adda iti abroad ti pamiliana ken dadduma pay a pagsapulan a pamataudan ti pagbiag.

TALDIAP TI KABIBIAG NI NAG-PRESIDENTE MANUEL L. QUEZON

Di mapilaw ti regget ni nag-Presidente Manuel L. Quezon a nangideklara iti Pilipino wenno Tagalog a “Nailian a Pagsasao” idi panawen ti Mankomunidad gapu ta daytoy a pagsasao idi ti naruay a maus-usar.  Naipasurot iti bulan ti Agosto a pannakayanak ni nag-Presidente Quezon ti pannakaselebrar ti “Buwan  ng Wika”. Ipalnaad ti lengguahe a Tagalog a daytoy ti dominante a pagsasao ti tao aglalo iti kabesera ti pagilian kadagidi a panawen ti Commonwealth Government agingga iti agdama. 

Di marubsi ti kinapudno ti pasnek ken kinamaingel ni nag-Presidente Quezon a nangrienda ti umuna a panagbannawag ti demokrasia. Natiltil ti gubat ken panagalla-alla ti bumangbangon a Gobierno ni Hen. Emilio F. Aguinaldo  ket naipatawid ti panagtarimaan ken ni Apo Quezon.

Dakkel a responsibilidad ti inakem ni Apo Quezon iti pakabuklan  ti Historia ti Pilipinas   kabayatan ti transision ti naisibet a rebolusion ken panaglinak bassit a makuna. Ta kalpasan ti sumagmamano a tawen a pannakapanday ti 1935 Constitution, addad’ta manen ti pangta ti Maikadua a Gubat a Sangalubongan! Saririt ken Biag ti naipuonan ni Apo Quezon tapno laeng matun-oyan ti pagilian ti normalidad ti talna.

Maiyataday unay a  mataginayon ti lagip ni nag-Presidente Manuel L. Quezon  ket dinto agkupas dagitoy a gapuananna a mangpamaris ti kabibiag  ti kadaraanna a Pilipino. # (Web Research)                               
DAGITI OPISIALES TI BARANGAY QUEZON

Nida S. Braceros
Punong Barangay

Roger B. Savella
Sangguniang Barangay Member

Engelberto M. Gazmen
Sangguniang Barangay Member

Nora C. Lopez
Sangguniang Barangay Member

Jesus Q. Purisima
Sangguniang Barangay Member

Estrellita M. Bermudez
Sangguniang Barangay Member

Adela G. Socias
Sangguniang Barangay Member

Maria Luzviminda A. Savellano
Sangguniang Barangay Member

Sherwin S. Salvatierra
Barangay Secretary
 
Elvira Consolacion P. Seguirre
Barangay Treasurer. # (Web In-Action)