COMUNAL MINI-DAM TI BRGY. REPPA-AC, MAPAGNUMARANDAN

Cabugao, Ilocos Sur – Naan-anayen  a nairingpas ti pagpakunotan dagiti mannalon iti Barangay Pug-os; Reppa-ac ken ti Barangay Bato babaen iti pannakaaramid ti kongkreto a Mini-dam a pagurnongan ti danum iti waig a mabatogan ti Barangay Reppa-ac, Cabugao, Ilocos Sur.

Nainagoraran daytoy a Mini-dam idi Disiembre 1, 2017 babaen iti panangidaulo ni Mayor Josh Edward S. Cobangbang a binayabay dagiti Opisiales ti ili; Barangay; Asosasion ken dagiti lumugar kadagiti nadakamat a barangay ken kas maysa a pangkulminar iti panagselebrar ti panagkasangay ti Ama ti Ili kadayta a petsa.

Daytoy a mini-dam ket pagpaulian/pagpakunotan  ti danum dagiti mannalon iti tallo a nadakamat a barangay babaen iti panangidaulo ni Mr. Prudencio Castillo, Presidente. 

Segun ken ni Mr. Obas Bill Y. Baclig, AT, Destino a Teknisian ti Munisipio kadagitoy a barangay nga umabot ti 100 Ektaria ti matalon no Wet Season Crop (Hunio Nobiembre) idinto ta 30 Ektaria met ti matalon iti Dry Season (Disiembre-Mayo). Pagay ken mais ti kaaduan a maimula iti Wet Season idinto ta tabako; pagay, mais ken nagduduma a natnateng ken cash crops iti Dry Season.

Rehistradon iti Securities and Exchange Commission (SEC) ti Pug-os-Reppa-ac-Bato Irrigators’ Association, Inc.  ken addaanen iti 104 a kameng. Agmitingda iti umuna a Domingo iti kada tallo a bulan.

Iti mitingda idi Disiembre 2, 2017, napagtutulaganda iti panagitedda iti Annual Fee a P120 iti kada miembro ken iti regular a panagdalusda iti waig; kanal ken iti minidam-da.

Daytoy a proyekto ket paset pay laeng  ti immuna a nayimplimentar a pannakapasayaat dagiti pagpadanuman kadagitoy tallo a barangay babaen iti Administrasion ni Mayor Edgardo “Ediboy” S. Cobangbang, Jr. ken maitultuloy iti agdama babaen iti LGU-Cabugao nga idauluan ni Mayor Josh Edward S. Cobangbang.

Iti pannaki-amad ti Web In-Action kadagiti  makausar iti minidam,  imbatadda a manam-ayanda ita iti  panangpadanumda iti pagtatalonanda ta addan  masnop a pagalaanda iti danumenda para kadagiti mulada. Impeksada pay  iti naan-anay a panagyamanda iti Gobierno Munisipal ti ili a Cabugao  kadagitoy a nainayon a  nagprogresuan kadagiti barangayda. # (Web In-Action)