Cabugao, Ilocos Sur – Naangay ti Launching ti “Alaga Ka Program” babaen ti panagkammayet ti Department of Health (DOH); Philhealth; DSWD; Land Bank of the Philippines (LBP); Provincial Government-Ilocos Sur ken iti LGU-Cabugao.
Nasapa a dimteng dagiti Philhealth Beneficiaries a naggapu iti nadumaduma a barangay kasta metten dagiti pannakabagi ti MSWDO-Cabugao, Medical Volunteers, ken pannakabagi dagiti nadakamat nga Ahensia a mangtarawidwid iti Member Data Record (MDR) Distribution kadagiti Philhealth Beneficiaries ti ili a Cabugao.
Iti naaramid a programa, nag-Welcome Address ni Vice Mayor Deogracias Jose Victorino “DJ” H. Savellano. Bininsana ti pateg ti salun-at a kas kangrunaan a ramen ti nakaysa ken dumurdur-as nga umili.
Imbagian met ni SP Member Jeremias “Jerry” C. Singson ni Governor Ryan Luis V. Singson a nagmensahe ket kinablaawanna ti amin ken dagiti umili ken Opisiales ti LGU-Cabugao. Dinayawna ti napintas a panagtunos dagiti Barangay ken ti Gobierno Lokal ti ili. Inapresiarna ti gapuanan ti ili maipapan iti programa ti Philhealth ket imbatad ti nalatak nga agpampanday ti linteg iti Hunta Probinsial nga umun-una latta ti ili ti Cabugao iti pakaseknan ti panangpasayaat ti salun-at iti intero a probinsia. Dinakamat pay ti SP Member a dagitoy a pagsayaatan ket maigapu met laeng iti nakaysa a liderato ken umili ti Cabugao iti agdama.
Nagsarita met ni Bokal Constante Oandasan. Simmaruno a nagsarita ni Ms. Elvira Ver, Regional Vice President, Philhealth. Imbatad ni Ms. Ver a kooperasion ti LGU kadagiti programa ti nakapilian ti Cabugao a pakailunsadan ti napateg a programa ti Philhealth ken DOH iti Probinsia. Imbinsana a maigapu iti dakkel a bilang ti Philhealth Enrolees ket dakdakkel met laeng ti awaten ti ili a “Capitation”, ited ti Ahensia a gatad nga agserbi para iti salun-at dagiti umili.
Naisaganad ti panagsarita ni Dr. Myrna C. Cabotaje, MD, MPH, CESO III, DOH Regional Director, Region 1 ket inlawlawagna ti kaipapanan ti programa: “Alaga Ka” ti DOH ken ti pateg ti “Kalusugan Pangkalahatan” a programa iti barangay. Gapu itoy, maikkan dagiti 33 a barangay iti kabukbukodan a ramit iti 33 Units ti Sphygmomanometer ken 33 a Weighing Scale a mausar dagiti agipatpatungpal ti pannakaaywan ti salun-at dagiti umili.
Nangipaay met ti Mensahe ni Mayor Edgardo “Ediboy” S. Cobangbang, Jr. Kinablaawanna ti amin a naitaripnong kadaytoy a Provincial Launching ti “Alaga Ka Program” ket inapresiarna ti makuna dagiti Opisiales ti Philhealth ken DOH a nakagasgasat dagiti umili ti Cabugao ta malaksid kadagiti ramit-medikal a maited ket innayon pay ni Mayor Ediboy a dinakamat dagiti Nebulizer a naited ni Gov. Ryan Luis V. Singson kadagiti barangay ti ili a Cabugao iti kallabes.
Pinagyamanan pay ti Ama ti Ili ti maipaay a Capitation Fund gapu iti 109 % a Philhealth Enrolees ti ili ket mainayon manen a maiserbi kadagiti umili babaen iti serbisio ti salun-at.
Ingunamgunam ti Alkalde Munisipal a taginayonen koma nga ipateg dagiti Philhealth Beneficiaries dagiti naipaay kadakuada a pagsayaatan. Pinagyamananna dagiti Opisiales ti DOH (Regional ken Provincial), Philhealth, Opisiales ti Gobierno Probinsial, Land Bank Manager, ken kasta metten dagiti kameng ti Sangguniang Bayan nga idauluan ni Vice Mayor DJ Savellano a nakikaysa kadaytoy a launching program.
Naisaganad ti Ceremonial ti MDR Distribution kadagiti Philhealth Beneficiaries babaen iti panangyawat da Mayor Ediboy a binayabay dagiti Opisiales ti DOH ken Philhealth ken kasta met kadagiti Opisiales ti LGU-Cabugao agraman ni MSWD Officer Mrs. Lydia S. Gazmen.
Naited pay babaen iti Ceremonial ti Tseke ti PEFPR (Per Family Payment Rate) a maipaay a pundo a maiserbi met laeng kadagiti umili.
Naaramid pay ti signing iti Commitment Wall dagiti Opisiales ken pannakabagi ti nadumaduma nga Ahensia a maseknan. Nangipaay ti Testimonia ni Mrs. Gloria T. Segui, Philhealth Beneficiary a nangipeksaanna iti pannakatulong ti programa ti Philhealth iti pamiliana.
Iti nasao a launching, nagatendar pay da Mr. Benjamin Castillo ti Provincial Health Office ken ni Mr. Francis F. Canosa, OIC, Local Health Insurance Office, Philhealth.
Iti Closing Remarks, kimmablaaw ken nagyaman ni SB Member Dr. Jemaima S. Tan-Yee, Committee Chair on Health and Services ti Konseho Munisipal kadagitoy a nagun-od dagiti umili ti Cabugao. Innayon ti Konsehala a saanda a maum-uma a mangyasideg ti pakaseknan dagiti umili kadagiti makatulong nga Ahensia agsipud ta sangsangkamaysada iti Gobierno Lokal nga idauluan ni Mayor Ediboy a mangipaay ti agtultuloy ken napunpunno a serbisio para iti pagimbagan dagiti umili ti Cabugao, Ilocos Sur. # (Web In-Action)
No comments:
Post a Comment