Cabugao, Ilocos Sur - Naangay ti pannakailunsad ti Expanded Age Coverage (EAC) Program kadagiti agtawen ti 15-18 nga annak dagiti kameng ti Pantawid Pamilyang Pilipino Program (4 Ps) iti 33 a barangay ti ili a Cabugao, Ilocos Sur babaen ti programa ti DSWD ken ipatungpal iti LGU-Cabugao.
Segun iti DSWD - 4 Ps Municipal Link Office-Cabugao ket mayimplimentaren ti Expanded Age Coverage (EAC) Program babaen iti pannakayenrol dagiti agbasa iti Elementaria ken High School a kaamaan ti 4 Ps ket maikkan ti Cash Grant a P500 ti High School idinto ta P300 ti Elementaria ken kasapulan ti 85% Attendance Rate-da nga agadal.
Naaramid ti Validation dagiti kameng ti DSWD-Regional Field Office (RFO) 1 ken pannakabagi ti MSWDO-Cabugao nga idauluan ni Mrs. Lydia S. Gazmen, Municipal Social Welfare Officer iti Registration dagiti Recipients babaen iti naisayangkat a Community Assemblies iti Cabugao Cultural and Sports Complex, Brgy. Rizal, Cabugao, Ilocos Sur idi Abril 9, 2014 kadagiti Potential Households iti 33 a barangays ti Munisipalidad.
Kaaduan ti naggapu iti Brgy. Lipit, Sisim, Turod ken Pug-os agsipud ta ditoy ti Catchment Area ti agbasbasa iti High School a kameng ti 4 P’s.
Sakbay a nairugi ti pakauna a programa, nagsarita ni Mrs. Gazmen ket inlawlawagna ti pakabuklan ti nainayon a programa ti DSWD. Impalagipna a taginayonen koma nga ipakita dagiti 4 Ps Beneficiaries ti laingda nga agtungpal kadagiti pagannurotan ti programa kasta met a mantenerenda ti kinadisiplinada a mangibanag ti pakausaran ti awatenda a tulong manipud iti Gobierno Nasional.
Iti nasao a programa, nagsarita ni SBM Dr. Jemaima S. Tan-Yee, Committee Chair on Social Services and Health a saanda koma laeng a maragsakan iti “monetary benefits” nga itden daytoy a programa no di pay ket mangtubay koma ti nasayaat a kababalin ken disiplina a nangruna kadagiti maseknan itoy a baro a programa ta addada iti Adolescence Stage (15-18 ti tawenda).
Nangipaay met ti Inspirational Message ni Mayor Edgardo “Ediboy” S. Cobangbang, Jr. kadagiti amin a naitallaong kadayta a panagtitipon. Kimmablaaw ken agyamyaman ti Ama ti Ili gapu iti Expanded Age Coverage Program ti 4 Ps ket gapu iti nasayaat nga ipakpakita dagiti Grantees ket maitultuloy a matulongan dagiti Benepisiario ket mangnamnama ti Alkalde Munisipal a napintas ti pagbanagan dagiti aw-awatenda a tulong maigapu kadagiti ubbing/agtutubo a pakaigapuan daytoy a programa. Innayon ni Mayor Ediboy a maysa pay a programa ti LGU ita iti panangtulongna iti pannakaipromot ti Alternative Learning System (ALS) a pakagun-odan ti adal dagiti Out-of-School Youth.
Insupusop pay ti Local Chief Executive a ditoy koma nga igastosda ti Benepisioda tapno mairaman met a maital-o ti ekonomia ti ili. Iti kasta, agsubli met laeng kadagiti umili dagitoy a maurnong a Taripa ti negosio babaen iti porma ti agduduma a serbisio a maipaay a pagsayaatan dagiti umili.
Nakikaysa met iti daytoy a taripnong da SB Member Vicky S. Serna, SB Member Josefina S. Vallejo, SB Member Jayhan Alcid-Tan ken ni ABC President, Brgy. Captain Thaddeus “Teddy” Soller. # (Web In-Action)
No comments:
Post a Comment