Cabugao, Ilocos Sur – Maipatungpal ti Special Program for the Employment of Students (SPES) a nagbuligan nga igannuat ti Department of Labor and Employment (DOLE)-Vigan City ken ti LGU-Cabugao nga idauluan ni Mayor Edgardo “Ediboy” S. Cobangbang, Jr. para kadagiti agkasapulan ti trabaho nga agad-adal ita a bakasion ti panagbasa 2014.
Segun iti rekord ti Human Resource Management Office (HRMO) nga idauluan ni Ms. Mimi Sison, HRM Officer ti LGU-Cabugao, umabot ti 50 nga estudiante ti maikkan iti trabaho ita a Summer Vacation 2014 babaen iti panagtrabahoda kadagiti Opisina ti nadumaduma a Departamento ti LGU a pakaidesignaranda. Pagrebbengan ti DOLE nga ipaay ti 60 % ti gunggonada nga agtrabaho idinto ta 40 % met ti aggapu iti LGU-Cabugao. Tallo a Batch ti naituyang a panagtrabaho dagitoy a nagaplikar nga estudiante a naggapu iti nadumaduma a barangay ti ili.
Iti pannakiuman ti Web In-Action kadagiti estudiante iti Abril 7, 2014, imbatad ni Harry Gaspar ti Brgy. Bato, Cabugao, Ilocos Sur a napintas daytoy a programa ti DOLE ken ti LGU ta mapagnumaranda ti tiempoda ken matulonganda dagiti nagannak kadakuada kabayatan a yur-urayda ti panaglukat ti klase ti Tawen 2014. Pinagyamananna pay ni Mayor Ediboy iti suporta ti LGU-Cabugao kadaytoy a programa para kadakuada nga agad-adal.
Ragsak, panagyaman ken panaggaggaget ti anag ti panagsaritada maipapan kadaytoy a nakairamananda a programa para iti estudiante iti nailatak da Donna Pichay ti Brgy. Rizal ken Mary-anne Sagnep ti Brgy. Namruangan ken dagiti kakaduada pay iti SPES. # (Web In-Action)
No comments:
Post a Comment