Cabugao, Ilocos Sur –Agtultuloy a maas-asikaso dagiti Free Patent Application (Residential) kadagiti agindeg iti Barangay a masakupan ti ili a Cabugao, Ilocos Sur kasta met iti Poblasion a kalikagumanna ti matituluan iti kabukbukodanda a daga.
Iti pannaki-amad ti Web In-Action iti Mayo 2, 2014, impakaammo ni Municipal Assessor Lilia S. Flores a naiwayat pay ti Cabugao Cadastral Survey Project tapno lehitimo a makapatitulo dagiti lot owners a masakupan ti Munisipalidad ti Cabugao babaen iti libre a serbisio ken panagkammayet a programa ti DENR Regional Office 1-Land Management Service (LMS) ken iti LGU-Cabugao nga idauluan ni Mayor Edgardo “Ediboy” S. Cobangbang, Jr.
Sakbayna, naaramid ti Pre-Titling Info-Drive ti DENR ken ti Municipal Assessor’s Office kadagiti barangay babaen iti pannakitinnulong dagiti Kapitanes ti Barangay kadagiti maseknan a kalugaranda.
Gapu itoy a programa, naiyawat kadagiti agtagikua iti napatituluan a daga babaen iti “Handog Titulo Program” babaen iti naangay a Ceremonial Awarding iti 107 a maited a Titulo iti karabiyan ti Abril 23, 2014 a rugi ti panagpiesta ti ili babaen iti panangyawat da Mayor Ediboy ken ni Governor Ryan Luis V. Singson a binayabay dagiti Opisiales ti DENR ken LGU iti imatang dagiti nagatendar nga umili iti Cabugao Central Park (CCP), Brgy. Bonifacio, Cabugao, Ilocos Sur. # (Web In-Action)
No comments:
Post a Comment