Monday, April 14, 2014

“FLUSHING” TI NISTC (WET SECTION), MAMIN-2 ITI LINAWAS

Cabugao, Ilocos Sur – Agtultuloy a maisayangkat iti nasaknap a panaglinis iti las-ud ti Tiendaan (NISTC Public Market) ti Cabugao  mangrugin  itoy a lawlawas a panamagsagana iti masungad ken kaaldawan ti napaut a    Lenten (Semana Santa)  Season 2014   ken iti Panagpiesta ti ili ti Cabugao inton Abril 23-26, 2014.

Segun ken ni Market Supervisor Norma S. Bertumen ket  mairaman nga inspeksionen-da dagiti paglakuan ti makan iti uneg ken iti ruar  kas iti pagibellenganda  ti danum ken rugitda, dagiti Comfort Rooms iti uneg/ruar ti pasdek  a kanayon koma a madalusan ken mamantener ken iti naynay a pannakalinis ti Wet Section (kakarnean/kaikanan).

Innayon ni Mrs. Bertumen a maar-aramid ti “Flushing” wenno pannakadalus ti danum babaen iti BFP-Cabugao iti Wet Section ti NISTC Public Market kada  malem ti Lunes ken iti Biernes iti linawas.

Dagitoy a gannuat ket pagtitinnulongan dagiti Personnel ti NISTC tapno maileppas iti naituding a panawen a maisagana para iti masungad a dua a dadakkel nga aktibidad iti Summer Vacation 2014 ditoy nga ili a panagdupudop ti tattao.

Dagitoy nga aksion ken inisiatiba ket mayannurot  iti agtultuloy a panangitandudo ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti naan-anay a pannakamantener daytoy a kangrunaan a  pampubliko a  pasilidad  tapno maited iti umisu a serbisio kadagiti marketgoers ken iti agtultuloy a sanitasion para iti sapasap. # (Web In-Action)

No comments:

Post a Comment