VIGAN CITY – Nasurok sangagasut a pagadalan ditoy probinsia a dinidigra ni Bagyo Mario ti immawat iti financial assistance manipud iti gobierno probinsial itay nabiit.
Inawat dagiti dadaulo dagiti pagadalan dagiti tseke iti nadumaduma a kantidad manipud iti P35,000 agingga iti P100,000.00 manipud ken ni Gov. Luis Singson iti provincial capitol kas tulong pinansial gapu iti didigra nga insangbay ni Tropical Storm Mario iti Ilocos Sur idi Septiembre 19 ken 20.
Gapu iti kadakkel ti nadadael iti inprastraktura, agrikultura, dagiti pagtaengan ken pagadalan, indeklara ni Singson ti probinsia nga under state of calamity.
Naggapu ti tulong pinansial manipud iti Special Education Fund ti gobierno probinsial ken naibatay iti resolusion dagiti dadaulo dagiti pagadalan dagiti tseke a naibunong.
Segun kadagiti dadaulo dagiti pagadalan nga immawat iti tulong pinansial, napapanawen ti pannakaited ti tulong pinansial agsipud ta kasapulanda unay iti pondo para kadagiti pagadalanda a dinadael ni Bagyo Mario. # (Adapted, Tawidnews)
No comments:
Post a Comment