Cabugao, Ilocos Sur – Naangay ti maudi iti innem a Sabado ti Math Classes dagiti nagrehistro nga ubbing nga agadal kadaytoy nga asignatura ti Elementaria idi Setiembre 27, 2014 ket maisagsagana manen dagiti napili a kangatuan ti nagun-od a grado para iti Math Competition iti nangatngato a Level.
Segun kadagiti Nagannak/Guardians a napan nagbantay idi Setiembre 27, 2014 ket saan a panagtaktak ti panangtarabayda kadagiti annakda iti maang-angay a Math Class iti tallo a pageskuelaan ti Cabugao DepED District iti intero a Munisipalidad ti Cabugao ita a bulan ti Setiembre 2014. Dagiti dua pay a pageskuelaan kalaksidan ti Cabugao North Central School a pannakasentro ti Math Class kadagiti pageskuelaan ket iti Cabugao South Central School ken iti Turod Elementary School, segun ken ni Ms. Madelene Sonido, Math Class Coordinator ti Cabugao South Central School.
Iti pannakiuman ti Web In-Action idi Setiembre 27, 2014, imbatad dagiti kaaduan a nagannak kadagiti ubbing a naanus a nagbantay iti ruar ti klase a maragragsakanda ta maipamaysa a masanay dagiti annakda iti Subject a Math.
Kadagiti met ubbing a nairaman kadaytoy a panagsanay ket kayatda met a takuatan ti kabaelanda ken maibilang a parte ti pannakadisiplinada daytoy nga aktibidad nga iwayat ti DepED.
Innayon dagiti mangisursuro a nupay silulukat daytoy a pagenrolan dagiti interesado nga ubbing ken nagannak, maobserbaran a kaaduan kadagiti nagenrol ken agdama nga agbasbasa ket pagduyosanda ti Matematika ken isuda ti kaaduan a nalaing iti klaseda iti pageskuelaanda nangruna iti Science Subject ken Mathematics a natibker a pagpuonan dagiti ubbing nga umagpang iti nangatngato a tukad ti adal. # (Web In-Action)
No comments:
Post a Comment