Cabugao, Ilocos Sur – Maang-angay ti dua nga aldaw a Cabugao District Sports Competition (Oktubre 4-5, 2015) iti Cabugao Athletic Oval, Cabugao South Central School, Brgy. Bonifacio, Cabugao, Ilocos Sur.
Dagiti agsasalip ket dagiti napili nga atleta iti uppat a Zona iti naangay a Zone Meet iti kallabes iti 26 a pageskuelaan a nakabuklan dagiti sumaganad: Zone 1- dagiti pageskuelaan ti Pug-os, Reppa-ac, Nagsantaan, Salapasap, Bungro, Margaay ken ti Cabugao North CS; Zone 2- dagiti pageskuelaan ti Turod, Namruangan, Daclapan, Salomague, Dardarat ken Sabang; Zone 3- Cabugao South CS, Sagayaden, Pila, Nagsincaoan ken Lipit; Zone 4 – dagiti pageskuelaan ti Maradodon, Catucdaan, Sisim, Cael-layan, Cuantacla, Aragan, Arnap ken Carusipan.
Iti rugi ti paay-ayam, Oktubre 4, 2015 ket naangay ti Parada iti aglikmut ti Poblasion a nagpartisiparan dagiti Atleta, Officiating Officials, Coaches, PTA Officials, Municipal Officials, ken Guests.
Nagtungpal ti Parada iti sango ti napapintas nga Stage ti likud ti Cabugao South Central School ket ditoy a nairugi ti Programa ken Coronation Rites.
Pakauna a sarita ti inted ni Mrs. Melvi S. Sajonia, Principal II, CSCS, ket impeksana ti nalaus a panagyamanda ta ditoy a pageskuelaan ti nakaipasdekan ti Cabugao Athletic Ground a pakaangayan manen dagiti dadakkel nga Sports Events ti DepED kas iti District Meet ita a Tawen 2015. Pinagyamanan pay ti Principal ti Gobierno Munisipal nga idauluan da Mayor Edgardo “Ediboy” S. Cobangbang, Jr. ken ni Vice Mayor DJ Savellano iti agtultuloy a panangilungalongda a mapasayaat dagiti pasilidad ti pagay-ayaman kasta metten iti agtultuloy a suporta ti LGU-Cabugao kadagiti aktibidad ti sports ken ti eskuela.
Nagsarita met ni Mr. Walberto A. Torres, CSCS PTA President.
Naisaruno ti Farewell March ti Mr. and Miss Sportsfest 2014.
Nangipaay ti Mensahe ni SBM Atty. Bryan Jett S. Pano, Committee Chair on Sports ket dinayawna ti napintas a panangkomplementar ti pageskuelaan kadagiti ilungalong ti LGU-Cabugao a pagsayaatan ti sports. Innayonna ti agtultuloy a panangiraman ti Gobierno Munisipal nga idauluan ni Mayor Ediboy kadagiti maaramid a pagsayaatan ti sektor ti edukasion ken sports.
Simmaganad ti pannakaaramid ti Investiture ti Mr. & Miss Sportfest 2015. Kinoronaan da Mayor Edgardo “Ediboy” S. Cobangbang, Jr. ken ni Dr. Concesa T. Rumias, Ed. D., Public Schools District Supervisor ti ili a Cabugao da Mr. Sportsfest 2015 ken ni Miss Sportsfest 2015.
Sash, Cape, Coronets, Scepter, Lei, Boquet ken Trophies met ti insaad dagiti kameng ti Konseho Munisipal nga idauluan ni Vice Mayor Deogracias Jose Victor H. Savellano agraman dagiti nagannak ken School Heads iti innem a Runner-ups ti nadumaduma a pagadalan.
Kalpasan ti intermission number ti CNCS Dance Troupe, nagsarita ni
Dr. Concesa T. Rumias, Ed. D., Public Schools District Supervisor ti ili a Cabugao. Kimmablaaw ken nagyaman ket inapresiarna ti naaramid a kabarbaro a pasilidad ti sports ti ili a Cabugao a naipasdek iti pageskuelaan ti Cabugao South Central School ken pakaangayan manen dagiti sumarsaruno nga sports event ti DepED kas iti Unit Meet ken iti Provincial Meet ita a Tawen. Pinadayawan pay ti Superbisora dagiti Municipal Officials nga idauluan ni Mayor Edgardo “Ediboy” S. Cobangbang, Jr. iti agtultuloy a suportada iti pakaseknan ti sports ken eskuela agraman dagiti PTA Officials ken dagiti School Heads iti pannakikaysada a nangisagana iti naindistrituan a paay-ayam.
Words of Gratitude ti binagi ni Mr. Ronel M. Ubaldo, District MAPEH Coordinator. Kimmablaaw ken nagyaman iti amin nga adda akemna iti pannakaipatungpal daytoy nga sports competition. Pinasingkedanna ti pannakaangay manen iti Unit Meet 2015 ken dadduma pay nga sports event ti DepED ditoy Cabugao Athletic Oval.
Naisaruno a naaramid ti Recessional. # (Web In-Acrtion)
No comments:
Post a Comment