Cabugao, Ilocos Sur – Iti pannaki-amad ti Web In-Action iti Hulio 20, 2017, imbatad ni Mr. Edgar S. Balangatan, AT, MENRO-Designate, Municipal Clean and Green and Solid Waste Program Coordinator iti agtultuloy a panaglinisda kadagiti pampubliko a pasilidad ti LGU-Cabugao.
Kanaig daytoy, regular a maiwayat iti Clean-up Drive iti pito a Coastal Barangay nga idauluan dagiti Opisiales ti Barangay-da iti parte a masakupanda babaen iti itutulong dagiti sektor ken asosasion iti barangayda.
Kabayatanna, maar-aramid latta ti regular a panaglinis iti agsumbangir ti Kalsada Nasional manipud Barangay Sagayaden agingga iti Barangay Pug-os babaen iti panagtinnulong dagiti LGU Personnel ti Clean and Green ken kameng ti Maintenance Section ti DPWH-Bantay, Ilocos Sur ken ti Kyeryong Company.
Nupay kasta, insupusop ni MENRO Balangatan a saan nga agsina a pakaseknan ti Munisipio iti maipapan iti Solid Waste Management ken iti Clean and Green iti intero a Munisipalidad ken uray iti uneg ti Tiendaan ti NISTC Public Market.
Kabayatanna, naannayas a maipatpatungpal ti Municipal Ordinance No. 2017-01 a maawagan iti “No Plastic Bag Day” iti kada aldaw ti Lunes a mangipawil iti panagusar iti Plastic Bags/Plastic Cellophane ken Styropor/Styrofoam para iti Packing /Bagging Materials. Kangrunaan pay laeng a pakaisentruan daytoy nga ordinansa kadagiti Tiendaan, National Highway ken disso dagiti pasilidades ti Gobierno Lokal.
Agtultuloy met a maipromot iti panagdaldalus kadagiti kalsada kadagiti barangay, segun ken ni MENRO Balangatan.
Dagitoy nga aksion ken inisiatiba ket resulta iti napintas a koordinasion dagiti Opisina ken Ahensia a maseknan ken adda iti salinong ti LGU-Cabugao nga idauluan ni Mayor Josh Edward S. Cobangbang. # (Web Situational Report)
No comments:
Post a Comment