Thursday, July 6, 2017

UPDATE TI STAC-CABUGAO

Cabugao, Ilocos Sur – Agtultuloy ti serbisio dagiti mangas-asikaso kadagiti  kliente nga ubbing  iti The Stimulation and Therapeutic Activity Center (STAC), institusion a pakaisuruan dagiti ubbing nga addaan ti nakayanakan nga an-annayen iti  pasdek ti STAC, CNCS Compound, Barangay Bonifacio, Cabugao, Ilocos Sur. 

Ti STAC ket  nagkammayet nga indur-as/imbuangay  ti Katipunan ng Maykapansanan sa Pilipinas, Inc. (KAMPI) ken ti Danish Society of Polio and Accidents Victim (PTU) manipud  idiay pagilian a Denmark. 

Iti agdama, ti MSWDO nga idauluan ni Mrs. Lydia S. Gazmen, Municipal Social Welfare Development Officer ti mangtartarawidwid iti STAC.

Dagiti Opisiales ti STAC Parents Association ti  katinnulong dagiti STAC Staff a mangitandudo iti pagdur-asan ti institusion. 

Maysa a kangrunaan a panggep ti STAC ket iti pannakaiyasideg dagiti ubbing  iti normal a pagadalan (CSCS) iti pasdek a pakaaturanda  tapno in-inut a maiyadaptar  ken dida maikawkawa  iti kasasaadda nga  umagpangto iti pormal nga edukasion iti elementaria.

Nabangon ti pasdek ti STAC iti compound ti Cabugao South Central School ken tultulongan ti LGU-Cabugao iti agdama iti pannakamantener ti nasao a pagadalan.

Siam  a tawenen  (Marso 2008)  ti STAC  manipud naipasdek ditoy ili a Cabugao, Ilocos Sur.  Maibilang  kadagiti satellites ti STAC iti Candon City,  Sta. Maria, Vigan City, Sto. Domingo, ken Cabugao. Inaldaw ti panag-duty-da dagiti  staff ti STAC idinto a mamindua iti makalawas a mayeskediul ti session dagiti agad-adal. Medical Certificate ken Birth Certificate dagiti kangrunaan a papeles ti   naikalikagum iti pannaikaipastrek dagiti ubbing nga agadal iti salinong ti STAC-Cabugao. # (Web In-Action)

No comments:

Post a Comment