Cabugao, Ilocos Sur – Naangay ti miting ti Municipal Development Council (MDC) nga idauluan ni Mayor Josh Edward S. Cobangbang iti ili a Cabugao para iti 2nd Half CY 2017 Municipal Development Council Meeting iti Hulio 5, 2017 sadiay Early Childhood Care Development Building, Brgy. Rizal, Cabugao, Ilocos Sur.
Nagatendar dagiti Kapitanes ti Barangay, pannakabagi dagiti NGO’s a kas iti Federated Farmers; Federated Cabugao Vegetable Growers and Producers Association, Onion and Garlic Growers Association; Federated RIC, Federated BNS; Indigenous People (IPs), MLGOO ken dadduma a sektor ti kagimongan.
Nag-Preside ditoy a miting ni ABC President Thaddeus U. Soller a kaduana da MPDC ken Budget Officer Florante S. Jara ken ni Former SBM Benedict M. Savellano, pannakabagi ni Congressman DV Savellano.
Linuktan ni MPDC Florante Jara ti miting babaen iti panangibinsana ti akem ti MDC iti pannakaiplano dagiti mapunduan a proyekto ken aktibidades a pagsayaatan ti sapasap iti Munisipalidad para iti Tawen 2017.
Naisaganad a naikkan ti gundaway dagiti pannakabagi ti tunggal sektor a nangyebkas iti pakaseknan ti itaktakderanda a hanay ken kasta metten dagiti kalikagumda a mapatgan.
Nagtitinnulong da ABC President Teddy Soller, MPDC Florante Jara ken ni Mr. Benedict M. Savellano a nangted iti maikanatad a sungbat kadagiti naidatag a pakaseknan ken kalikagum dagiti nagduduma a sektor.
Inggunamgunam ti ABC President a maidatag dagitoy a singasing babaen iti Project Proposal Document ket maipalaon ditoy iti tallo a kangrunaan a maiprayoridad a proyekto sa matugawan ken maestudiar sakbay a maisubmiterda iti LGU-Cabugao.
Innayon ti ABC President a kasapulan a maikkan ti pinal a kopia ti Project Proposal-da iti MPDC tapno adda met kopiada ken mairaman iti Annual Investment Plan ta biroken met ti mangited ti pundo iti kopia nga aggapu ditoy Munisipio no nakaraman met laeng daytoy a makidkiddaw a proyekto.
Naballigi a nataming dagiti dadduma pay a pakaseknan a naidatag ket naigunamgunam a kasapulan iti teamwork dagiti sektor tapno maileppasda dagiti Project Proposal-da iti mayataday a panawen. # (Web In-Action)
No comments:
Post a Comment