Cabugao, Ilocos Sur – Agtultuloy a maar-aramid ti Dental Check-up kadagiti Day Care Pulpils iti intero a Munisipalidad ti Cabugao iti kada aldaw ti Martes iti Cecilia T. Flores Memorial Dental Clinic, Brgy. Rizal, Cabugao, Ilocos Sur.
Imbatad ni Mrs. Lydia S. Gazmen, MSWD Officer a babaen iti koordinasion ti MSWDO ken iti Doktor ti Dental Clinic ket mayeskediul ti papan dagiti ubbing iti tunggal Day Care Center (DCC) nga agpaamiris ti ngipenda iti nasao a dental clinic.
Ita a lawas, nagpa-Dental Check-up dagiti Day Care Pupils iti Barangay Sisim; Brgy. Ali-naay ken iti Brgy. Aragan ket tinarabay ida ti Child Development Worker-da kasta metten ni Dr. Anastacia De Los Reyes, DMD agraman ti kameng ti Staff iti nasao a dental clinic.
Malaksid iti naan-anay a pannakaasikaso dagiti ngipen dagiti agdakkel nga ubbing ket maikkanda pay iti libre nga usarenda iti panagsugigida a kanayon ket impaay daytoy kadakuada ti LGU-Cabugao.
Dagitoy nga aksion ket gubuay iti koordinasion ti Provincial Health Office ken iti LGU Cabugao nga idauluan ni Mayor Josh Edward S. Cobangbang tapno mamantener ti dental a salun-at dagiti umili a maysa a kapatgan nga aspeto iti salun-at nga agtultuloy a matagiben. # (Web In-Action)
No comments:
Post a Comment