Cabugao, Ilocos Sur – Maysa kadagiti napateg a gay-at ita ti Gobierno Munisipal nga idauluan ni Mayor Josh Edward S. Cobangbang ket iti pannakatakuat dagiti maipanawen, nabiit, ken na-presio a klase ti maimula dagiti mannalon nangruna iti “off-season” babaen iti panangipatungpal ti DA-LGU iti kada panagmumula tapno manayonan ti matgedan dagiti mannalon ken mapapintas ti presio iti balanse a kaadu ti produksion.
Maysa ti mais a nabiit, kasapulan iti merkado ken eco-friendly a mairagragpin a maimula ditoy Ilokos. Ti panagmula ti mais ket maipatpatungpal babaen iti Departamento ti Agrikultura (DA) ken iti LGU ket adda latta deretso nga agmulmula ti yellow ken white corn kadagiti kaaduan a Barangay ti ili a Cabugao, Ilocos Sur uray pay iti Wet Season (Hunio-Nobiembre).
Segun kadagiti Opisiales ti asosasion ti mannalon a nupay maipangruna met latta ti panagmulada iti tabako iti Dry Season (Nobiembre-Mayo) ta nalawlawa ti mamulaan ti tabako ngem adu latta ti bilang ti ektaria iti mamulaan ti mais. Innayonda a napintas daytoy a pannakabalanse ken mapaggigidiat ti maimula iti umabot iti 2, 271 ektaria a kalawa ti mamulmulaan/mataltalon a daga iti intero nga ili ti Cabugao iti dua a cropping season.
Kabayatanna, naaramid ti FFS-Demo-Farm ti mais kadagiti mayataday a lokasion iti Cabugao, Ilocos Sur ken manamnama a naikurri dagiti naadalda dagiti nagpartisipar iti Farmers’ Field School Program ti DA-RFO 1 kadagiti barangay a timmulong a nangisayangkat ti programa ti DA-LGU.
Nupay kasta, ti agtultuloy a panagmulada ti puraw a mais ket saan a nakadadanag ta nataray a lakuen ta para pay iti konsumo ti kaaduan.
Ti panagmula ti mais ket naiget a kasapulan iti industria ti panagtaraken ti baboy ken manok ken mabalin a pagsulnit ti mais a pagtaraon no bumassit ti suplay ti bagas. # (Web In-Action)
No comments:
Post a Comment