Dagiti benepisio a maipaay kadagiti amin a Barangay Health Workers (BHWs) iti akin-amianan a paset ti Luzon ti natratar kabayatan ti panagtataripnong dagiti dadaulo ti grupo itay nabiit.
Napasamak ti taripnong idiay Tuguegarao City, Cagayan nga inatendaran dagiti presidente ti BHWs iti amin a Local Government Units (LGUs) iti amianan a paset ti Luzon.
Segun ken ni Mildred Fernando, agdama a presidente ti BHWs iti Dingras, Ilocos Norte, nakiddaw manen ti pannangipaay koma ti gobierno ti benepisio dagiti agretiro a BHWs ken pannakaited ti regular nga “honorarium” ti BHWs iti intero a pagilian.
Kinunana nga immunan a nakiddaw iti gobierno idi 2014 a maikkan koma ti benepisio dagiti agretiro a BHWs ngem agingga ita awan pay paglawaganna.
Inlawlawagna a numan pay boluntario ti panagserbi dagiti BHWs, adu ti obligasion ken annungenda iti uneg ti barangay kangrunaanna kadagiti lumugar a makasapul ti serbisioda.
Kabayatanna, impasigurado dagiti dadaulo-nasional ti BHWs nga aramidenda amin a kabaelanda tapno maipadanun ti kalikagumda iti Gobierno ni Presidente Rodrigo Duterte ken tapno maiyimplementar a dagus daytoy. # Source - (FG-PIA-R01)
No comments:
Post a Comment