Cabugao, Ilocos Sur – Naangay ti Meeting ti Association of Barangay Council/Barangay Captains (ABC) iti Early Childhood Care Development Center (ECCD) Building iti Hulio 2, 2018. Ni ABC President Thaddeus “Teddy” U. Soller ti nag-Preside iti nadakamat a miting a binayabay ni OIC MLG Officer Honey Lou C. Baguso.
Iti Meeting Proper, imbinsabinsa ti MLG Officer dagiti proseso a masurot iti pannakaangay ti Eleksion ti Liga ng mga Barangay ditoy nga ili. Naaramid ti pannakapili dagiti kameng ti Nomination Committee; Election Committee ken Board nga agserbi iti nadakamat nga Eleksion.
Naikkan met ti gundaway ni Public Health Nurse Ms. Janet A. Sison iti RHU-Cabugao a nangilawlawag ti aktibidad a Cardiopulmonary Resuscitation (CPR) Training (KISS Project) a maangay inton Hulio 8, 2018 iti Cabugao Cultural and Sports Complex babaen iti panagatendar dagiti Barangay Officials. Kasta metten a nairapin a naipakaammo iti panagpartisipar dagiti Barangay Officials iti maangay a Bloodletting Drive 2018 babaen iti panagkammayet ti LGU-Cabugao ken ti Medical Staff ti Mariano Marcos Memorial Hospital, Batac City inton Hulio 12, 2018 ket maangay ti bloodletting idiay RHU-Cabugao, Ilocos Sur iti 8:00am-4:00pm iti dayta a petsa.
Nagsarita met ni ABC President Thaddeus U. Soller maipapan iti pakaseknan ti eleksion ti Liga; dadduma a pagrebbengan nga ammuen dagiti baro nga opisiales iti barangay pakaseknan iti trabahoda; 20 % ti IRA Fund; Calamity Fund; pagrebbenganda nga opisiales no dumteng ti kalamidad ken prayoridad a proyekto ti barangayda a mapapunduan iti pannakaipatungpal ti RA 7171 ditoy nga ili.
Naballigi met a nataming dagiti dadduma pay a pakaseknan dagiti Barangay ken Kakapitanes a nagatendar iti Pederasion. # (Web In-Action)
No comments:
Post a Comment